NBA Ning türk waskétbol cholpini Uyghurlargha erkinlik telep qildi

Amérika döletlik waskétbol birleshmisi-NBA da top oynaydighan türk cholpini enes kanter 22-‍öktebir twittérda söz qilip, xitayni Uyghur lagér tutqunlirini boshitishqa, Uyghurlargha erkinlik bérishke chaqirghan. U yene musulman döletlirining Uyghurlar mesilisidiki pozitsiyesi “Nomusssizliq” we “Munapiqliq” dep eyibligen. Enes kanter buning sel aldida tibetlerge erklinlik telep qilghanliqi seweblik uning kamandisi “Boston séltekis” ning téngshün toridiki waskétbol oyunlirini cheklep qoyghan. Biraq u buning arqidinla twittérda Uyghurlarni qollap widéyo élan qilghan.

U mundaq digen: “Irqiy qirghinchiliq yüz bériwatidu. Shu tapta, men del bu sözlerni qiliwatqan waqitning özide. Qiyin-qistaq, mejburi bala chüshürüsh, mejburiy tughmas qilish, a'ililerni parchilash, jaza lagérliri, siyasi qayta terbiyelesh lagérliri, mejburi emgek qatarliqlar yüz bériwatidu. Bularning hemmisi shu tapning özide bir milyon 800 mingdin artuq Uyghurlarda, yeni xitayning gherbiy-shimalidiki shinjang dégen jayda yüz bériwatidu.”

Enes kanter yene Uyghurlarning musulman türkiy qewm ikenliki, ularning ‍öz diniy, medeniyiti, tili, tarixi we kimlikini saqlap kelgenliki uchün xitayning yoqitish nishanligha aylan'ghanliqi, xitay hökümitining ularni yoqilang bahaneler bilen yoqitiwatqanliqini tekitligen.

U yene bu qirghinchiliqqa süküt qilghan we uni körmeslikke séliwatqan musulman dölet rehberlirini tenqidligen. U pakistan bash ministiri imran xan, se'udi erebistan padishahi salman bin abdul'eziz, erep birleshme xelipilikining emiri muhemmed bin za'id, iran prézidénti ibrahim re'isige xitap qilip: “Xitay bilen soda qilish we pul tépishni kishilik hoquqtin üstün orun'gha qoyushunglar, nomussizliq we munapiqliqtur” dégen. U yene misirliq dangliq putbul cholpini muhemmet salah, amérikaliq waskétbol cholpini kerim abduljappar, hindistanliq kino cholpini amir xanlarni Uyghurlar üchün sözleshke chaqirghan.