Олимпик тәнһәрикәт йиғинида чиқирилған хитай байриқидики хаталиқ муназирә қозғиди

3-Авғусттин буян риоде жанейрода өткүзүлүватқан олимпик тәнһәрикәт йиғинида чиқирилған хитай байриқидики хаталиқ муназирә қозғиди.

Мусабиқә башлинип 2-күни хитай тәнһәрикәтчилири 3 алтун медал, 2 көмүш медал вә 3 мис медал билән америкидин қалса иккинчи орунни игилигән. Әмма медал тапшуруш мурасимлирида чиқирилған хитай дөләт байриқидики кичик юлтузларниң орунлаштурулушидики хаталиқ хитай тордашлири арисида муназирә темисиға айланған. Хитайниң һөкүмәт хәвәрлиридә хитай олимпик вәкилләр өмикиниң олимпик комитетиға бу мәсилини инкас қилип түзитишкә тиришиватқанлиқи тилға елинған.

Мәлум болушичә, әсли хитай байриқида кичик төт юлтузниң ички чоқиси ялғуз чоң юлтузниң мәркизигә, охшаш булуң вә охшаш арилиқта яй шәкилдә тоғрилап орунлаштурулған.

Һалбуки, бу алдинқи бир нәччә күндин буян мурасимларда чиқирилған хитай байриқидики төт кичик юлтуз айланма шәкилдә җайлаштурулған болсиму, әмма уларниң ички чоққиси ялғуз чоң юлтузниң мәркизигә тоғриланмастин, бәлки уларниң үстүнки қисми чоң юлтуз билән параллел қилип орунлаштурулған икән.

Твиттер, үндидар қатарлиқ иҗтимаий алақә торлирида муназирә вә мәсхирә темиси болғини, олимпик мусабиқисидин ибарәт хәлқаралиқ чоң мусабиқидә өлчәмсиз ясалған хитай дөләт байриқиниң чиқирилиши вә бу байрақниң хитайниң җеҗяң өлкиси вуйи шәһиридики җиңйи тоқулма мәһсулатлар ширкити тәрипидин ишләнгән “хитай мели” болғанлиқи икән, әмма мәзкур ширкәт мәсули 8-авғуст мухбирларға баянат берип өлчәмсиз дөләт байриқиниң мәзкур ширкәтниң мәһсулати әмәсликини билдүргән.