Olimpik tenheriket yighinida chiqirilghan xitay bayriqidiki xataliq munazire qozghidi
2016.08.09
3-Awghusttin buyan ri'odé zhanéyroda ötküzülüwatqan olimpik tenheriket yighinida chiqirilghan xitay bayriqidiki xataliq munazire qozghidi.
Musabiqe bashlinip 2-küni xitay tenheriketchiliri 3 altun médal, 2 kömüsh médal we 3 mis médal bilen amérikidin qalsa ikkinchi orunni igiligen. Emma médal tapshurush murasimlirida chiqirilghan xitay dölet bayriqidiki kichik yultuzlarning orunlashturulushidiki xataliq xitay tordashliri arisida munazire témisigha aylan'ghan. Xitayning hökümet xewerliride xitay olimpik wekiller ömikining olimpik komitétigha bu mesilini inkas qilip tüzitishke tirishiwatqanliqi tilgha élin'ghan.
Melum bolushiche, esli xitay bayriqida kichik töt yultuzning ichki choqisi yalghuz chong yultuzning merkizige, oxshash bulung we oxshash ariliqta yay shekilde toghrilap orunlashturulghan.
Halbuki, bu aldinqi bir nechche kündin buyan murasimlarda chiqirilghan xitay bayriqidiki töt kichik yultuz aylanma shekilde jaylashturulghan bolsimu, emma ularning ichki choqqisi yalghuz chong yultuzning merkizige toghrilanmastin, belki ularning üstünki qismi chong yultuz bilen parallél qilip orunlashturulghan iken.
Twittér, ündidar qatarliq ijtima'iy alaqe torlirida munazire we mesxire témisi bolghini, olimpik musabiqisidin ibaret xelq'araliq chong musabiqide ölchemsiz yasalghan xitay dölet bayriqining chiqirilishi we bu bayraqning xitayning jéjyang ölkisi wuyi shehiridiki jingyi toqulma mehsulatlar shirkiti teripidin ishlen'gen “Xitay méli” bolghanliqi iken, emma mezkur shirket mes'uli 8-awghust muxbirlargha bayanat bérip ölchemsiz dölet bayriqining mezkur shirketning mehsulati emeslikini bildürgen.