Herqaysi puqrawiy teshkilatlar yawropa ittipaqigha béyjing olimpik musabiqisi heqqide birleshme mektup yollidi

Muxbirimiz eziz
2021-12-14
Share

Xitay sahibxanliq qilmaqchi boluwatqan béyjing qishliq olimpik musabiqisi yéqinlawatqanda 250 tin köprek puqrawiy teshkilatlar birleshme mektup teyyarlap, yawropa ittipaqigha yollidi hemde ularning béyjing olimpik musabiqisini diplomatik bayqut qilishini telep qildi. Dunya Uyghur qurultiyining tor bétide élan qilin'ghan mezkur ochuq mektupni Uyghurlar, tibetler, xitaylar, mongghullar we teywenliklerning muhajirettiki teshkilatliri teyyarlap chiqqan bolup, yawropa ittipaqining üch yilda bir échilidighan bashliqlar yighini harpisida ulargha tapshurulghan.

Mezkur ochuq mektupta 9-dékabir küni musteqil xaraktérdiki “Uyghur sot kollégiyesi” ning “Xitay hökümiti nöwette gherezlik halda sistémiliq shekil alghan irqiy qirghinchiliqni ijra qiliwatidu” dégen mezmunda sot hökümi chiqarghanliqi alahide eskertilgen. Shuningdek “Mushundaq qirghinchiliq we insaniyetke qarshi jinayet sadir qiliwatqan bir döletning olimpik musabiqisini diplomatik bayqut qilmasliq hemde uninggha qatnishish mahiyette ashu qirghinchiliq we zulumgha shérik bolghanliqqa barawer,” dep körsitilgen.

Ochuq mektupta yene bir milyon tibet ösmürning xitay hökümiti tesis qilghan yataqliq mekteplerge yighiwélin'ghanliqi, xongkongdiki démokratiye namayishlirigha ishtirak qilghan pa'aliyetchilerning qamaqqa höküm qilinishi qatarliq ehwallarmu alahide tilgha élin'ghan. Shuningdek amérika, en'gliye, kanada, awstraliye qatarliq ellerning olimpik musabiqisini diplomatik bayqut qilghanliqi, bundaq ehwalda yawropa ttipaqining bu musabiqini birleshme shekilde diplomatik bayqut qilishi, “Tarixning toghra teripini tallash bolidighanliqi” alahide tekitlin'gen.

Melum bolushiche, bu mektupqa dolqun eysa, buchung séréng, téng byaw, roshen abbas, én'gébatu togochog, ömer qanat qatarliq kishiler yawropa, amérika, awstraliye qatarliq jaylardiki 250 tin artuq puqrawiy teshkilatqa wakaliten imza qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet