Gensuluq ösmürning torda uchur tarqatqanliqi seweblik mekteptin heydilishi munazire qozghidi

Bu yil 9-ay mezgilide “Torda ösek söz tarqatti” dégen jinayet bilen eyiblinip tutqun qilinip, jem'iyetning bésimi bilen qoyup bérilgen, toluqsiz ottura mektepning 3-yilliq oqughuchisi, gensuluq ösmür yang xuy, 18-noyabir düshenbe küni mekteptin heydelgen.

Yang xuyning a'ilisidikiler bu xewerni xelq'ara metbu'atlargha ashkarilighandin kéyin, tor béketliridiki munazirilerde, “15 Yashliq ösmürning torgha uchur yollighanliqi üchünla, mekteptin heydilishtek éghir jazagha uchrishi qanunsizliq!” dep eyiblendi.

Yang xuy bu yil 12-séntebir küni, yurti gensu ölkisining jang jachüen bazirida tépilghan namelum erning jesiti toghriliq, saqchilar éniq melumat bermey turup, tor béketliride öz gumanini ashkara élan qilghan. Bu sewebtin u eyni chaghda yéngidin qarardin ötken belgilimige asasen tunji qétim tutqun qilin'ghan. Kéyin da'iriler jem'iyettin kelgen éghir bésim seweblik yang xuyni qanun boyiche jazalash buyruqini emeldin qaldurghan idi.

Yang xuy oquwatqan mektep da'iriliri yang xuyni mekteptin heydesh buyruqi chüshürüshige, yuqiridin kelgen bésim seweb bolghanliqini bildürgen. Emma yang xuy we uning a'ilisidikiler dawamliq erz qilidighanliqini bildürüp, mekteptin heydesh jazasi bérilishining adaletsiz qarar bolghanliqini tekitligen.