Җүмә күни пакистанда арқа-арқидин йүз бәргән һуҗумларда 40 дин артуқ адәм өлди

Мухбиримиз әркин
2017.06.23
Share on WhatsApp
Share on WhatsApp

Җүмә күни пакистанда арқа-арқидин йүз бәргән партлаш вә һуҗумларда 40 адәм өлгән. Партлашниң бири, балучистан өлкисиниң мәркизи куата шәһиридә мәйданға кәлгән болуп, пакистан сақчи аптомобилиға қаритилған бу һуҗумда 13 адәм өлгән, 20 адәм яриланған. Ройтерс агентлиқи шу күни йәнә, пакистанниң ғәрбий шималидики парачинарда йүз бәргән партлашта 27 адәм өлгәнликини, карачи шәһиридә қораллиқ кишиләрниң 4 сақчини етип өлтүргәнликини хәвәр қилди.

Фирансийә агентлиқиниң хәвәр қилишичә, куатадики партлашта өлгән 13 кишиниң 9 нәпири сақчи икән. Куатадики партлаш йеқинда мәзкур шәһәрдә даиш тәрипидин гөрүгә елинған бир җүп әр-аял хитай пуқрасиниң өлтүрүлүш вәқәсидин кейин йүз берип диққәт қозғиди. Куата шәһиридә оқутқучилиқ қиливатқан бу хитай әр-аял бу йил 24‏-май куатаниң җиннаһ базирида даиш қораллиқлири тәрипидин гөрүгә елинған. Даишниң амақ ахбарат агентлиқи 8‏-июн күни хәвәр тарқитип, бу икки хитайниң өлтүрүлгәнликини елан қилған. 

Бу вәқә, қазақистан пайтәхти астанада өткүзүлүватқан ш һ т ниң башлиқлар йиғини мәзгилигә тоғра келип, йиғинда пакистан баш министири наваз шәрип ши җинпиңниң соғуқ муамилисигә учриған. 

Фирансийә агентлиқиниң билдүрүшичә, даириләр патлашниң сақчиларни нишан қилғанлиқини билдүргән болсиму, әмма һуҗумниң муддиаси мәлум әмәсликини илгири сүргән. Балучистан хитай-пакистан иқтисади каридориниң гвадар порти җайлашқан өлкә. Хитай һөкүмити 57 милярд доллар мәбләғ селишни пилан қилған бу каридор пакистан һөкүмитиниң күчлүк қарши елишиға еришкән болсиму, бирақ балучистан йәрлик хәлқиниң қаршилиқиға учрап кәлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт