Панама хитай билән болған ачқучлуқ қанал тохтамини ахирлаштуридиғанлиқи тоғрисида вәдә бәргән

Америка хәвәр таратқулириға асасланғанда, америка ташқи ишлар министири марко рубийониң зиярити нәтиҗисидә панама хитай билән болған ачқучлуқ қанал тохтамини ахирлаштуридиғанлиқи вә америка билән һәмкарлишидиғанлиқи тоғрисида вәдә бәргән.

 “фокес хәвәрлири” (FOX News) гә асасланғанда, йәкшәнбә күни америка ташқи ишлар министири марко рубийо (Marco Rubio) панама пирезиденти җосе раул мулино (José Raúl Mulino) билән көрүшкәндә, пирезидент доналд трампниң панаманиң һалқилиқ тошуш қанилиниң контрол қилиш һоқуқини хитайға бәргәнлики тоғрисидики әйиблишини йәткүзгән. Панама пирезиденти җосе раул мулино хитай билән болған муһим тәрәққият вә һәмкарлиқ келишимини ахирлаштуридиғанлиқи тоғрисида вәдә бәргән.

Америка ташқи ишлар министирлиқи баянатчиси тамми бруси бу һәқтә баянат берип мундақ дегән: “мако рубийо трампниң учурини панама пирезиденти җосе раул мулиноға йәткүзүп, хитайниң хоңкоңдики ширкәт арқилиқ қаналниң кириш еғизиға йеқин икки портни башқуруп су йолиға тәһдит қиливатқанлиқини, шуниң билән бир вақитта буниң америка-панама шәртнамисигә хилап икәнликини билдүрди”.

Панама пирезиденти җосе раул мулино марко рубийо билән көрүшкәндин кейин мухбирларға мундақ дегән: “мениңчә марко рубийониң бу зиярити панама вә американиң йеқин мунасивәт орнитишиға йеңи пурсәтләр елип келиду. Һәмдә американиң панамаға салған мәблиғини имканқәдәр ашурушиға түрткә болиду. Биз, хитай билән болған қанал тохтамини мумкин қәдәр балдур ахирлаштурушқа тиришимиз”.

 Америка ташқи ишлар министирлиқиниң мөлчәрлишичә, панама қанилидин өтидиған барлиқ парахотларниң тәхминән %72 и америка портлиридин келидикән яки америка портлириға баридикән.