Хитай хәлқарада байқут қилишқа учриған “шинҗаң пахтиси” ни қутқузушқа мәҗбур болған

Хитай һөкүмити хәлқарада уйғурларни мәҗбурий әмгәккә селиш билән әйиблинип байқут қилишқа учриған “шинҗаң пахтиси” ға 50 милярд йүән қәрз берип, униң ишләпчиқириши вә баһасини турақлаштурушқа мәҗбур болған. Көзәткүчиләрниң пәрәз қилишичә, бу әһвал американиң “шинҗаң пахтиси” да ишләпчиқирилған мәһсулатларни импорт қилишни чәклиши, нурғун даңлиқ хәлқара ширкәтләрниң “шинҗаң пахтиси” ишлитишни байқут қилиши униң райондики пахта ишләпчиқиришиға қаттиқ тәсир қилип, қутқузушқа мәҗбур болғанлиқини көрситидикән.

Шинхуа агентлиқиниң 17-сентәбирдики хәвиридә ашкарилинишичә, хитай йеза игилик тәрәққият банкиси бу йил күздә пахта ширкәтлиригә 50 милярд йүән алаһидә етибар баһада қәрз тарқитишни қарар қилған. Хәвәрдә, буниң пахта базири вә пахта баһасини муқимлаштурушни мәқсәт қилғанлиқи тәкитләнгән.

Хитай һөкүмитиниң 2017-йилдин башлап милйондин артуқ уйғурни түрмә вә лагерларға қамиши, пахта ишләпчиқиришни ‍өз ичигә ‍алған кәң саһәләрдә мәҗбурий әмгәккә селиши америка башчилиқидики ғәрб дөләтлириниң җиддий инкасини қозғиған.

Америка таможна вә чегра қоғдаш идариси ‍өткән йили “шинҗаң пахтиси” да ишләпчиқирилған мәһсулатларни чәклигән. Хәлқара “алий сүпәтлик пахта тәшкилати” “шинҗаң пахтиси” ишлитишни тохтатқанлиқини елан қилғаниди. Мәлум болушичә, хитай йеза игилик тәрәққият банкисиниң 50 милярд йүән қәрз пули райондики 3 милйон тоннидин артуқ пахта сетивалған ширкәтләрни қоллашқа қаритилғаникән. Хәвәрдә, райондики 149 ширкәтниң бу ‍өлчәмгә чүшидиғанлиқини билдүргән.