Xitay hökümiti xitayda ikkinchi perzentlik bolushni yolgha qoyghandin buyan, yiligha 20 milyun bowaqning tughuliwatqanliqini ilgiri sürgen.
Xelq torining bu heqtiki xewirige qarighanda, xitayda ikki perzentlik bolush siyasiti yolgha qoyulghan bir yildin buyan hamildar bolidighan ayallarning sani shiddet bilen köpiyip, doxturxanilardiki tughut bölimining karwatliri yétishmeywatqanliqi melum.
Xewerde déyilishiche, 2016-yili xitayda tughulghan bowaqlar sani 17 milyon 500 mingdin éship, 2000-yilning aldi-keynide tughulghan nopus kölimi bilen tengleshken.
Melum bolushiche, béyjing, shangxey qatarliq xitayning chong sheherliridiki hamildar ayallarning tughutigha yene yérim yil qalghan waqittin bashlap tughut bölümining kariwitini aldin tizimlitishqa bashlaydiken. Jem'iyetshunaslar, buni xitayda uzun yil tughut cheklesh we bir perzentlik tüzüm axirlashqandin kéyin xitay ahaliliride körüliwatqan ijtima'iy we psixologiyelik tengpungsizliqning alamiti dep qarimaqtiken.
Xitay hökümet taratquliri bu heqte mexsus xewer bérip, 2017-we 2018-yilining xitayda bala tughuwalidighan eng yaxshi purset ikenlikini, 2019-yilidin bashlap xitayda tughulidighan bowaqlarning tedrijiy halda normal haletke qaytidighanliqini bildürgen.
