Даириләр уйғур елидә почта йолланмилирида кимлик түзүми йолға қоюлидиғанлиқини уқтурди

Мухбиримиз меһрибан
2015-08-26

25 - Авғуст хитайниң "шинхуа агентлиқи", "шинҗаң хәвәрлири" қатарлиқ һөкүмәт таратқулирида уйғур аптоном райони даирисидә тез почта йолланмилирида кимликни хатириләш түзүми йолға қоюлидиғанлиқи, алаһидә чоң болған хатириләш паалийәтлири мәзгиллиридә уйғур аптоном районидики почта йолланмилири қаттиқ тәкшүрүштин өтидиғанлиқи, шизаң аптоном райониниң бәзи районлирида почта йолланмилири тохтитилидиғанлиқи хәвәр қилинди.

"шинҗаң хәвәрләр" ториниң 25 - авғусттики хәвиридә 8 - айдин башлап"уйғур аптонум райони даириси ичидә тез почта йолламилирида кимликни хатириләш түзүми йолға қоюлуп, қаттиқ тәкшүрүштин өтти" дегән тамға бесилғандин кейинла андин бу йолламиниң әвәтилидиғанлиқи хәвәр қилинди.

Хәвәрдә йәнә, йеқинда дөләтлик почта идариси,җамаәт хәвпсизлик министирлики, дөләт бихәтәрлик министири бирликтә чиқарған "японға қарши урушниң 70 йиллиқини хатириләш қатарлиқ чоң көләмлик паалийәтләр мәзгилидики почта йолланмилири алаһидә тәдбири" гә асасән, 2015 - йили 10 - айда өткүзүлидиған уйғур аптонум райони қурулғанлиқиниң 60 йиллиқи, тибәт аптоном райониниң 50 йиллиқини хатириләш паалийәтлири мәзгилидики бихәтәрликкә капаләтлик қилиш үчүн, 9 - айниң 15 - күнидин 10 - айниң 3 - күнигә қәдәр болған арилиқта почтидин әвәтилидиған һәрқандақ йолланминиң 100% лик ш нури бихәтәрлик тәкшүрүшидин өкүзүлидиғанлиқи тәкитләнгән.

Үрүмчидин радиомиз зияритини қобул қилған үрүмчи шүнфиң тез йолланма ширкитиниң мәсули лию әпәндиниң билдүрүшичә, шизаңниң бәзи районлириға әвәтилидиған тез йолланмилар тохтитилған. Бейҗиң вә тйәнҗингә йоллинидиған йолланмилар алаһидә қаттиқ тәкшүрүштин өтидикән. Бейҗиңда әң тез болғанда 9 - айниң 5 - күнигичә почта йолланмилирини нормал йоллаш әслигә келидикән. Әмма бу йил 10 - айда уйғур аптоном райониң 60 йиллиқини тәбрикләш паалийити өткүзилидиғанлиқи үчүн, уйғур аптонум районидики почта йолланмилириниң нормал һаләткә келиш вақти 10 - айниң ахириға қәдәр созулуши мумкин икән.