Қарамай-майтағ йолида қатнаш вәқәси йүз берип, майбак аптомобилидин зәһәрлик мадда чиқип кәткән

Мухбиримиз әркин
2016-12-16
Share

Қарамай-майтағ йолида зәнҗирсиман қатнаш вәқәси йүз берип, вәқәдә һадисигә учриған бир майбак аптомобилидин зәһәрлик суюқлуқ чиқип кәткән. Хәвәрләрдин мәлум болушичә, майбак аптомобили аз кәм 32 тонна еғирлиқидики, бензинға қошидиған бир хил зәһәрлик суюқлуқ қачилап майтағ тәрәпкә кетиватқан икән.

Хитай ахбарат васитилиридә, вәқәниң лйәнйүнгаң-қорғас таш йолиниң қарамай-майтағ бөликидә йүз бәргәнлики хәвәр қилинди. "җуңго ахбарат тори" ниң 15‏-декабир бәргән хәвиридә илгири сүрүшичә, қатнаш вәқәси 14‏-декабир кәч саәтләрдә йүз бәргән. Вәқәгә һавани туман қаплап, таш йолларни муз тутуп кетиши сәвәб болған. Хәвәрдә қайт қилишичә, майбак аптомобили җиддий тормуз тутқан болсиму, әмма алдики аптомобил билән болған арилиқи бәк йеқин болғачқа, униң қуйруқиға келип соқулған. Вәқәдә майбак тешилип кетип, зәһәрлик суюқлуқ чиқип кәткән.

Хитай ахбарат хәвәрлиридә билдүрүшичә, шихәнзә от өчүрүш тармақлири нәқ мәйданға келип, май бактики зәһәрлик маддини башқа аптомобилға йөткигән һәм бурунқи май бакиға су қоюп берип, униңдики қалдуқ зәһәрлик суюқлуқни тазилиған. Әмма хәвәрдә, бу вәқәниң муһит вә әтраптики кишиләргә көрсәткән тәсири тилға елинмиған.

Мәзкур бензин хуручи маторниң йеқилғуни толуқ көйдүрүп, униң хизмитини яхшилишиға ярдәм қилсиму, әмма у муһит вә адәмгә интайин зиянлиқ бир хил суюқлуқтур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт