قازاقىستان ئۇيغۇر تەنھەرىكەتچىسى خەلقئارا چامباشچىلىق مۇسابىقىسىدە نەتىجە قازاندى

مۇخبىرىمىز ئۈمىدۋار
2017-10-01
Share

ئۇيغۇرلار قازاقىستاندىكى ئاز نوپۇسلۇق مىللەتلەرنىڭ بىرى بولۇشىغا قارىماي، ئۇلار ئارىسىدىن سپورتنىڭ بوكس، چامباشچىلىق ۋە باشقا تۈرلىرى بويىچە بىر قىسىم دۇنيا چېمپىيونلىرى، ئاسىيا چېمپىيونلىرى شۇنىڭدەك يەنە ئوتتۇرا ئاسىيا ۋە رۇسىيە دائىرىسىدە ئۆتكۈزۈلگەن مۇسابىقىلەرنىڭ چېمپىيونلىرى يېتىشىپ چىققاندىن سىرت يەنە تۈرلۈك خەلقئارالىق مۇسابىقىلەردە كۈمۈش ۋە مىس مېدال ئالغانلارنىڭ سانىمۇ مەلۇم سالماقنى ئىگىلەيدۇ. ئەنە شۇلارنىڭ بىرى ئۇيغۇر يىگىتى رۇسلان لىبىروف يېقىندا تەيۋەندە ئۆتكۈزۈلگەن 29-قېتىملىق خەلقئارالىق ئەركىن چامباشچىلىق مۇسابىقىسىدە 2-ئورۇننى ئىگىلىگەن.

«ئۇيغۇر ئاۋازى» گېزىتىنىڭ خەۋەر قىلىشىچە، قازاقىستاننىڭ ئەركىن چامباشچىلىق ساھەسىدە 6 قېتىملىق چېمپىيون بولغان رۇسلان لىبىروف تەيۋەندە ئۆتكۈزۈلگەن بۇ قېتىملىق مۇسابىقىدە 70 كىلوگراملىقلار تۈرى بويىچە كۈمۈش مېدالغا ئېرىشىپ، قازاقىستان ۋە ئۇيغۇرلار ئۈچۈن شەرەپ قۇچقان. 

مەلۇم بولۇشىچە، رۇسلان لىبىروفنىڭ مەشقاۋۇلى، ئۇيغۇر چامباشچىلىق ماھىرى ئالىك جەلىلوف بولۇپ، ئۇ ئىلگىرى بىر قانچە قېتىم ئاسىيا ۋە مۇستەقىل دۆلەتلەر ھەمدوستلۇقىدىكى مۇسابىقىلەردە چېمپىيون بولغان ۋە 2-ئورۇننى ئىگىلىگەن تەنھەرىكەتچى ئىدى.

خەۋەردىن مەلۇم بولۇشىچە، قازاقىستان ئۇيغۇرلىرى ئارىسىدا يېقىندىن بۇيان چامباشچىلىق تەنھەرىكىتى كۈچىيىشكە باشلىغان بولۇپ، بۇ ساھەدە ئونلىغان كۇلۇبلار قۇرۇلغان. «ياركەنت» دەپ ئاتالغان كۇلۇبتىلا ئۇيغۇر چامباشچىلىق مەشقاۋۇلى يۈسۈپجان ۋەلىيېۋنىڭ يېتەكچىلىكىدە 70 دىن ئارتۇق ياش-ئۆسمۈر مەشىق قىلماقتا ئىكەن.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت