Даириләр бу йил уйғур елида 4 миңдин артуқ йеза “қош тил йәслиси” ни кеңәйтип қуридиғанлиқини билдүргән

Мухбиримиз қутлан
2017-01-23
Share

22-январ күни уйғур аптоном районлуқ даириләр маарип хизмити бойичә телевизийә йиғини ачқан болуп, бу йил йеза-кәнтләрдә йеңидин қурулидиған яки даирисини кеңәйтип қуридиған “қош тил йәсли” лириниң 4 миңдин ашидиғанлиқини билдүргән.

Шинхва ториниң бу һәқтики мәхсус хәвиригә қариғанда, бу йил хитай һөкүмити уйғур аптоном райони тәвәсидики “йеза-кәнт қош тил йәсли” лиригә ғайәт зор мәбләғ салидикән.

Хәвәрдә дейилишичә, 2017-йилида уйғур аптоном районида җәмий 4387 орунда йеза “қош тил йәслиси” йеңидин қурулидикән яки кеңәйтип қурулидикән. Буниң ичидә йеңидин қурулидиғанлири 3287, кеңәйтип қурулидиғанлири 1100 болуп, кәлгүсидики үч йил ичидә һәқсиз “қош тиллиқ йәсли” маарипида тәрбийәлинидиған йеза балилириниң санини 560 миңға йәткүзүш мөлчәрләнмәктикән.

Игилинишичә, даириләрниң уйғур елида пүтүн күч билән омумлаштуруватқан аталмиш “қош тиллиқ йәсли маарипи” ниң асасий нишани уйғурлар мәркәзлик олтурақлашқан җәнубтики 3 вилайәт бир областқа қаритилған икән.

Хитай һөкүмәт таратқулири бу һәқтики тәшвиқатни җиддий елип бериватқанлиқи мәлум болмақта. Болупму йеқиндин буян учтурпан наһийәсиниң имамлирим йезисида “дөләт тили мәктипи” ечип, уйғур балилирини хитай тили вә мәдәнийити бойичә тәрбийәләватқан сиясий актип қурбан ниязниң иш-излири хитай таратқулириниң тәшвиқат нишаниға айланған.

Мәзкур мәктәптә оқуватқан уйғур балилириға хитайларниң әнәниви кийимлири кийдүрүлүп, коңзи вә меңзи услубидики оқутуш кәйпияти билән тәрбийәлиниши чәтәлләрдики уйғур паалийәтчилириниң күчлүк тәнқидигә дуч кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт