Җу хәйлун йәкәндә “туғқанлишиш һәптилики” ни адәткә айландурушни тәшәббус қилған

Мухбиримиз шөһрәт һошур
2018-05-30
Share

Уйғур аптоном районлуқ парткомниң муавин секретари, аптоном районлуқ сиясий-қанун комитетиниң секретари җу хәйлун 27‏-майдин 29‏-майға қәдәр йәкәндә елип барған хизмәт тәкшүрүши давамида аталмиш “туғқанлишиш һәптилики” паалийитини адәткә айландурушни тәшәббус қилған.

Ахбаратлардин ашкарилинишичә, уйғур аптоном районлуқ даириләр өткән йили 12‏-айниң 8‏-күнидин 28‏-күнигичә болған 3 һәптә вақитни “туғқанлишиш һәптилики” дәп бекиткән вә көп санда хитай кадирни йеза-базарларға әвәтип, уларни йәрлик аһалиләр билән биллә тамақлиниш, биллә йетип-қопуш вә биллә ишләшкә орунлаштурған икән. Хитайниң бу қилмиши шу чағда хәлқара ахбаратларниң диққитини тартқан. Кишилик һоқуқ тәшкилатлири хитайниң бу паалийәт арқилиқ кишиләрниң шәхсий һаяти вә аилә мәхпийәтлик һоқуқиға дәхли-тәруз қиливатқанлиқи вә миллий өрп-адәтләрни дәпсәндә қиливатқанлиқини әйиблигән иди. Җу хәйлун бу қетимқи йәкән зиярити давамида өзиниң аталмиш туғқини мәхәт давут дегән кишини йоқлиған. У хуласә сөзидә мәркәзниң уйғур аптоном районини башқуруштики җәмийәт муқимлиқи вә әбәдий әминликни һәммидин үстүн орунға қоюш чақириқини йәниму қаттиқ тәдбирләр билән иҗра қилишни тәкитлигән.

Аталмиш “туғқанлишиш һәптилики” ни адәткә айландурушни тәләп қилған секретар җу хәйлун уйғур аптоном райониниң сиясий-қанунға мәсул секретари болуш сүпити билән уйғур районидики “йепиқ тәрбийә һәрикити” ни “явайи чөпләрни йоқитиш үчүн зираәткә дора чечиш” қа охшатқан иди. Нөвәттә уйғур районида әң омумий вә әң җиддий түрдә елип бериливатқан хизмәт “йепиқ тәрбийә” хизмити болсиму, әмма җу хәйлун бу қетимқи сәпиридә “йепиқ тәрбийә лагерлири” һәққидә тинмиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт