Qurban héyt harpisida “Ammidin hal sorash” qa barghan ma shingruy, islamni xitaychilashturushni tekitligen

Washin'gtondin muxbirimiz jewlan teyyarlidi
2024.06.17

Qurban héyt yétip kélish aldida, Uyghur aptonom rayonluq partkom sékrétari ma shingruy ürümchidiki asasiy qatlam ahalisini tekshürüp-tetqiq qilishqa barghan. U her millet kadirliri, emgek nemunichiliridin “Qurban héytliq hal sorash” bilen birge, ahale komitétlirining rolini dawamliq jari qildurushni tekitligen bolsa,  diniy sahedikiler bilen uchrashqanda ulargha “Islam dinini xitaychilashturush” yönilishide ching turushni tekitligen.

Xitayche “Tengritagh tori”, “Shinjang géziti” torining 16-iyun künidiki bu xewirige qarighanda, ma shingruy ürümchi shehiri ahalisini közdin kechürüp, ilghar partiye ezaliri we  kadirlar a'ilisini yoqlighanda asasiy qatlam xizmitide, bolupmu “Shinjangni tüzesh” xizmitide ahale komitétlirining halqiliq rol oynaydighanliqini tekitligen. Melum bolghinidek, xitay da'iriliri 2017-yildin bashlighan keng kölemlik basturush herikitide ahale komitétlirigha pewqul'adde hoquqlarni bérip, ürümchi we bashqa sheherlerdiki Uyghur ahalisini toluq kontrol qilishqa zémin hazirlighanidi.

Ma shingruy yene shinjang islam institutining ürümchidiki tarmiqigha bérip ehwal igiligen hemde diniy xadimlarni terbiyeligende “Islam dinini xitaychilashturush” yönilishide ching turushni, “Shinjangdiki dinlar inaqliqi, jem'iyet inaqliqi, milletler inaqliqini ilgiri sürüsh” te aktip rol oynashni telep qilghan.

Melum bolghinidek, xitay hökümiti 2016-yildin bashlap, “Islam dinini xitaychilashturush” siyasitini yolgha qoyup kelgen bolup, sherqiy türkistan ölimalar birlikining ezasi turghunjan alawidin bu siyasetni xitayning islam dinini yoqitish siyasiti dep chüshendürgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.