Рабийә қадир ханим америка авам палата рәиси нәнси пилуси билән көрүшкән

Мухбиримиз әркин
2019.09.20
Share on WhatsApp
Share on WhatsApp

Дуня уйғур қурултийиниң сабиқ рәиси, “уйғур хәлқара кишилик һоқуқ вә демократийә фонди” ниң қурғучиси рабийә қадир ханим 19‏-сентәбир күни америка дөләт мәҗлисидә авам палатасиниң рәиси нәнси пилуси ханим билән көрүшүп, уйғурларниң нөвәттики вәзийити вә өзиниң һазирғичә из-дерики болмиған аилә әзалириниң әһвали һәққидә сөһбәт елип барған.

Бу қетимлиқ көрүшүшниң кимниң илтимасиға бинаән елип берилғанлиқи мәлум әмәс. Әмма нәнси пилуси ханим 19‏-сентәбир күни өзиниң твиттер һесабида рабийә қадир ханим билән чүшкән рәсимини һәмбәһирләп, “бүгүн америка дөләт мәҗлисидә қәдирлик достум, паалийәтчи вә рәһбәр рабийә қадирни уйғур хәлқиниң намида күтүвелип, униң из-дерики болмиған аилә әзалириниң әһвали вә уйғур хәлқи дуч келиватқан вәзийәт һәққидә музакириләрдә болғанлиқимдин пәхирлинимән” дәп язған. 

Американиң сиясий сәһнисидики ‏3-номурлуқ шәхс болған нәнси пилуси ханимниң “уйғур кишилик һоқуқ сиясити қанун лайиһиси” ниң авам палатадики нусхиси авазға қоюлушни күтүп турған бир мәзгилдә рабийә қадир ханим билән көрүшүши диққәт қозғиди. Нәнси пилуси ханим “уйғур кишилик һоқуқ сиясити қанун лайиһиси” гә имза қоюп, уни актип қоллаватқан авам палата әзалириниң бири. У бу йил язда вашингтонда өткүзүлгән бир йиғинда “әгәр америка уйғур мәсилисигә авазини чиқармиса, кишилик һоқуқ мәсилисидә өзиниң хәлқарадики нопузини йоқитип қойидиғанлиқи” ни агаһландурған иди. Мәзкур қанун лайиһисиниң йәнә бир нусхиси буниңдин бир қанчә күн аввал кеңәш палатасида мақулланған иди. Қанун лайиһисиниң кеңәш палатасида мақуллиниши билән кишиләрниң диққити авам палатасиға буралған иди. Иккийлән көрүшкәндә қанун лайиһисиниң күнтәртипкә кәлгән-кәлмигәнлики мәлум әмәс. Кеңәш палатаси мәзкур қанун лайиһисини мақуллиғандин кейин кишилик һоқуқ тәшкилатлири вә кеңәш палатасиниң бәзи әзалири қанун лайиһисиниң авам палатасида тезрәк мақуллинишини тәләп қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.