Путинниң бейҗиң зияритидә көп санда келишим имзаланди

Мухбиримиз үмидвар
2016-06-27
Share


Русийә президенти владимир путин ташкәнттә өткүзүлгән шаңхәй һәмкарлиқ тәшкилати алий рәһбәрләр йиғидин кейинла хитайға йетип келип, шәнбә күни хитай дөләт рәиси ши җинпиң билән сөһбәт өткүзди.

Русийә вә хитай мәтбуатлириниң ашкарилишичә, владимир путинниң бу қетимқи зиярити җәрянида икки дөләт арисида нефит вә тәбиий газ, транспорт, қурулуш, мәдәнийәт, учур қатарлиқ көп түрләр бойичә 30 хилдин артуқ келишим имзаланған.

Русийәниң "5 тв.Ру" ториниң йезишичә, икки тәрәп арисидики келишимләр ичидә әң зори, "москва - бейҗиң" тез сүрәтлик төмүр йол қурулуш пилани вә униң тәркиби болған"москва - қазан" тез пойиз йоли қурулуши икән, мәзкур бирләшмә лайиһиниң баһаси 7 трилийон рублиға тохтиған.

Бу, владимир путин билән ши җинпиңниң бир һәптә ичидә икки қетим көрүш иши болуп, улар алди билән ташкәнттики йигин җәрянида русийә - хитай һәмкарлиқлири һәққидиму пикир алмаштурған иди.

Б б с агентлиқиниң йезишичә, ши җинпиң билән владимир путин учришишта ортақ һалда русийә билән хитайниң омумий йүзлүк истратегийилик шериклик мунасивитини қәтий тәврәнмәй, техиму чоққурлаштуридиғанлиқини тәкитлигән.

Бу қетим бейҗиңда "русийә - хитай инақ қошнадарчилиқ, достлуқ вә һәмкарлиқ шәртнамиси"ниң имзаланғанлиқиниң 15 йиллиқи вә русийә - хитай истратегийилик шериклик мунасивити орнитилғанлиқиниң 20 йиллиқи хатириләнгән. Бу, путинниң 2012 - йиидин буян хитайни 5 - қетим зиярәт қилишидур. Ши җинпиң һакимийәткә чиққандин кейин 5 қетим русийәни зиярәт қилған вә путин билән 15 қетим һәр хил сорунда учрашқан.

Мулаһизичиләрниң қаришичә, украина кризиси мунасивити билән ғәрбниң русийәгә иқтисади имбарго қоюши русийә иқтисадиға җидди тәсир көрсәткән болуп, путин ғәрбкә тақабил турушта хитай билән болған сода - иқтисадий вә сиясий һәмкарлиқни техиму ашуруш истратегийиси қолланмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт