Putinning béyjing ziyaritide köp sanda kélishim imzalandi

Rusiye prézidénti wladimir putin tashkentte ötküzülgen shangxey hemkarliq teshkilati aliy rehberler yighidin kéyinla xitaygha yétip kélip, shenbe küni xitay dölet re'isi shi jinping bilen söhbet ötküzdi.

Rusiye we xitay metbu'atlirining ashkarilishiche, wladimir putinning bu qétimqi ziyariti jeryanida ikki dölet arisida néfit we tebi'iy gaz, transport, qurulush, medeniyet, uchur qatarliq köp türler boyiche 30 xildin artuq kélishim imzalan'ghan.

Rusiyening “5 Tw.Ru” torining yézishiche, ikki terep arisidiki kélishimler ichide eng zori, “Moskwa - béyjing” téz sür'etlik tömür yol qurulush pilani we uning terkibi bolghan“Moskwa - qazan” téz poyiz yoli qurulushi iken, mezkur birleshme layihining bahasi 7 triliyon rubligha toxtighan.

Bu, wladimir putin bilen shi jinpingning bir hepte ichide ikki qétim körüsh ishi bolup, ular aldi bilen tashkenttiki yigin jeryanida rusiye - xitay hemkarliqliri heqqidimu pikir almashturghan idi.

B b s agéntliqining yézishiche, shi jinping bilen wladimir putin uchrishishta ortaq halda rusiye bilen xitayning omumiy yüzlük istratégiyilik shériklik munasiwitini qet'iy tewrenmey, téximu choqqurlashturidighanliqini tekitligen.

Bu qétim béyjingda “Rusiye - xitay inaq qoshnadarchiliq, dostluq we hemkarliq shertnamisi”ning imzalan'ghanliqining 15 yilliqi we rusiye - xitay istratégiyilik shériklik munasiwiti ornitilghanliqining 20 yilliqi xatirilen'gen. Bu, putinning 2012 - yi'idin buyan xitayni 5 - qétim ziyaret qilishidur. Shi jinping hakimiyetke chiqqandin kéyin 5 qétim rusiyeni ziyaret qilghan we putin bilen 15 qétim her xil sorunda uchrashqan.

Mulahizichilerning qarishiche, ukra'ina krizisi munasiwiti bilen gherbning rusiyege iqtisadi imbargo qoyushi rusiye iqtisadigha jiddi tesir körsetken bolup, putin gherbke taqabil turushta xitay bilen bolghan soda - iqtisadiy we siyasiy hemkarliqni téximu ashurush istratégiyisi qollanmaqta iken.