Saqchi instituti oqughuchiliri qeshqer, xoten, aqsu qatarliq jaylarda chéniqturulidiken

Muxbirimiz ümidwar
2017.07.09
Share on WhatsApp
Share on WhatsApp

Uyghur aptonom rayon da'iriliri 2009-yilidiki “5-Iyul ürümchi weqesi” ning 8 yilliqi tolghan künde ürümchi shehirige jaylashqan shinjang saqchi institutida mezkur institutning 1800 neper oqughuchisining Uyghur diyarining jenubigha bérip, emeliy xizmetlerge qatnishish sepirige atlinish qesemyad murasimi ötküzgen.

“Shinjang iqtisad géziti” ning xewiridin melum bolushiche, saqchi institutining mezkur 1800 neperdin artuq oqughuchisi qeshqer, xoten, aqsu we qizilsu tewesidiki jama'et xewpsizlik organlirining her türlük xizmetlirige qatnashturulup, chéniqturulidiken. Xewerde ilgiri sürülüshiche, mezkur oqughuchilarning bu rayonlarda chéniqturulushidiki meqsetler qatarida ularning kespi tonushi we emeliy jeng qilish iqtidarini ashurush orun alghan.

Xitay da'iriliri atalmish “Üch xil küchler” ge qarshi “Xelq urushi” élip baridighanliqini jakarlighandin buyan ilgiri-kéyin ürümchi, qeshqer, xoten, aqsu qatarliq sheherlerde köp qétim qoralliq saqchi qisim, jama'et xewpsizlik saqchi we bashqa türdiki amanliq küchlirini ishqa sélip herbiy heywe körsitish hem qesem bérish murasimlirini ötküzgen idi.

Közetküchilerning qarishiche, xitay da'irilirining Uyghur diyarining jenubini “Térrorizmgha qarshi jeng meydani” dep jakarlap, bu rayonda zor sandiki kadirlar etretliri, saqchi küchlirini ishqa sélip, yéza-kentlerge qaratqan nazaret we bashqurushni izchil ashuruwatqanliqi inkas qilinmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.