Америкадики бир ахбарат орни хитайниң үрүмчидики сақчи санданини ашкарлиди

Мухбиримиз әркин
2021-02-01
Share

Америкадики "интерсепт" намлиқ ахбарат орни хитайниң үрүмчидики бир сақчи сандани "санлиқ мәлумат амбири" ни ашкарилап, хитайниң уйғурларни қандақ назарәт қилидиғанлиқи вә бастуридиғанлиқи тоғрисида йәнә бир қетим хәлқаралиқ ғулғула қозғиди.

Мәзкур ахбарат орни 29-январ елан қилған доклатида хитай аманлиқ органлириниң еришкән санлиқ мәлумати 52 гегабайитқа йетидиғанлиқи, униң 250 милйон қурға йеқин санлиқ мәлуматни өз ичигә алидиғанлиқини билдүргән. Көзәткүчиләрниң қаришичә, мәзкур сақчи санлиқ мәлумат амбири хитайниң уйғурларға йүргүзиватқан "ирқий қирғинчилиқи" ни техиму конкирет учурлар билән тәминләйдикән.

Бу санлиқ мәлумат амбири хитайниң "тор тазилаш қаравули" намлиқ янфон һөҗҗәтлирини назарәт қилиш юмтали йиғқан учурларни, мәһәллә муқимлиқ йиғинлириниң хатирисини, һәр хил мунасивәтлик һөҗҗәтләрни, истихбарат учурлирини, тәкшүрүлгән йәрлик әслиһәләр, җәмийәттики гуманлиқ кишиләргә аит учурларни өз ичигә алған икән. Униң янфон тәкшүрүши һәққидидики санлиқ мәлуматида, үрүмчидә 23 ай ичидә 11 милйонға йеқин қисқа учур, 11 милйон 800 миң телефон хатирә учурини топлиғанлиқи илгири сүрүлгән. Доклатта тәкитлишичә, бу санлиқ мәлуматта йәнә хитай даилириниң 2018-йили 3-айда үрүмчиниң 30 миң нупуслуқ чидаван районида елип берилған 4 һәптилик янфон тәкшүрүшиму тәпсилий хатириләнгән.

Үрүмчи шәһриниң мәзкур сақчи санлиқ мәлумати хитай һөкүмити уйғурларға "ирқий қирғинчилиқ" йүргүзгәнликини рәт қилип, хәлқарада кәң тәшвиқат һуҗуми башлиған мәзгилдә ашкарланди. "интерсепт" ниң доклатида тәкитлишичә, бу санлиқ мәлумат хитайниң пуқраларни назарәт қилғанлиқи, лагерларни қурғанлиқи, балиларни аилисидин айрип ятақлиқ мәктәпләргә орунластурғанлиқи, қәбристанлиқларни бузғанлиқи, уйғур нупусини системилиқ контрол қилғанлиқини йорутуп беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт