Xitaydin tarqalghan "SARS" qa oxshaydighan wirus yaponiyedimu bayqaldi

Muxbirimiz irade
2020-01-16
Élxet
Pikir
Share
Print

Xitayning wuxen shehiridiki bir béliq baziridin tarqalghanliqi melum bolghan "SARS" qa oxshaydighan wirus yaponiyedimu bayqaldi. 16-Yanwar peyshenbe küni yaponiye da'iriliri yéqinda wuxen'ge bérip kelgen bir kishining bu wirus bilen yuqumlan'ghanliqini delillidi.

Ikki kün aldida tayland da'iriliri taylandqa sayahetke kelgen bir xitay ayalning bu wirus bilen yuqumlinip, doxturxanigha élin'ghanliqini élan qilghan idi. CNN Téléwiziyesining xewer qilishiche, bu késellikning yaponiyedimu bayqilishi asiya döletliride endishe qozghighan.

Mezkur wirus 2002-2003-yilliri xitaydin bashlinip, 34 döletke tarqalghan we 700 din oshuq kishining jénigha zamin bolghan "SARS" wirusi bilen oxshash tipliq wirus iken. Bu wirus xitayning wuxen shehiridiki bir béliq baziridin tarqalghan bolup, 1-yanwar künidin étibaren bu bazar péchetlen'gen. Bu bazarda béliqtin bashqa, qush, toshqan we yilan qatarliq bashqa janliqlarmu sétilidiken. Nöwette mutexessisler bu wirusning menbesi üstide jiddiy izdenmektiken.

Biraq dunya sehiye teshkilatning ashkarilishiche, yuqiriqi her ikki bimar özlirining yéqin mezgilde wuxendiki bu béliq bazirini ziyaret qilmighanliqini éytqan. CNN Ning xewiride éytilishiche, wuxendin kelgen bu sayahetchi ayal bir bolsa bu wirusni bashqa bir ademdin yaki bashqa bir béliq baziridiki haywandin yuqturuwalghanliq éhtimalliqi yuqiri iken. Biraq tetqiqatchilar birinchi xil éhtimalliqni, yeni ademdin yuqqan bolush éhtimalini yuqiri, dep mölcherligen.

Hazirghiche, bu wirus sewebidin bir adem jénidin ayrilghan, bir qanche on kishi dawalashqa élin'ghan. Biraq bu wirusning ademdin-ademge yuqush éhtimalliqi jiddiy endishe qozghimaqta.

Toluq bet