Xitayda “Qehriman” namliq saxta süt parashoki bayqilip ammining naraziliqini qozghidi

Xitayning suju shehiride yéqinda gollandiyining Hero yeni qehriman markiliq süt parashokining saxtisi bayqalghan.

Melum bolushiche, gherb elliride ishlen'gen yémeklik mehsulatlirigha qarita éhtiyaj kücheygendin kéyin, bezi shirketler bashqurush tüzümidiki boshluqlardin paydilinip, chet'el mallirining saxtisini ishlepchiqarghan. Sujudiki bir téléwiziye istansisi saxta markiliq süt parashokini xewer qilip tarqatqandin kéyin, bu weqe amma arisida küchlük ghulghula peyda qilghan.

Radi'omiz xitayche bölümining xewer qilishiche, bu heqte torda pikir bayan qilghan bezi kishiler, balilarning jénigha qest qilghan saxta süt parashoki satquchilarning jazalinishini telep qilsa, yene bezi kishiler, mesilining yiltizi siyasiy tüzülmide ikenlikini tilgha élip, mana bu xil weqelerge purset bérip kéliwatqan xitay hökümitini tenqid qilghan. Bolupmu, saxta süt parashoki téléwizorda élan qilin'ghandin kéyinmu, qehriman namliq saxta süt parashokining dukanlarning tekchiliridin derhal éliwétilmesliki kishilerning küchlük ghezipini qozghighan.

Xitayda 2008-yili yüz bergen süpetsiz süt parashoki weqeside, mutexessislerning bayqishiche, 300 mingdin artuq nareside bala qoghushundin zeherlinip ziyankeshlikke uchrighan.