Хитай ташқи ишлар министирлиқи американиң «җасур аяллар мукапати» ға еришкән сайрагүл саутбайға һуҗум қилди

Мухбиримиз әркин
2020-03-07
Share

Хитай ташқи ишлар министирлиқи баянат елан қилип, 4‏-феврал күни америка ташқи ишлар министирлиқиниң «җасур аяллар» мукапатиға еришкән моңғолкүрәлик қазақ қизи, лагер шаһити сайрагүл саутбайға һуҗум қилған. Сайрагүл саутбай америка ташқи ишлар министирлиқиниң бу йиллиқ «җасур аяллар мукапати» ға лайиқ көрүлүп, 2019‏-йилидики 10 дуняви җәсур аялниң бири болуп талланған. 4‏-Феврал күни америка ташқи ишлар министирлиқида өткүзүлгән мурасимда мукапатни униңға ташқи ишлар министири майк помпео тәқдим қилған. У: «сайрагүл хитай һөкүмитиниң мусулманларға немиләрни қиливатқанлиқи һәққидә тунҗи болуп гуваһлиқ бәргүчиләрниң биридур» дегән.

Хитай ташқи ишлар министирлиқи баянатчиси җав лиҗйән 6‏-март буниңға инкас билдүрүп, сайрагүл саутбайниң чегридин қанунсиз өткән қачқун икәнлики, униң қәрз алдамчилиқи барлиқи, уни һечқачан лагерда туруп бақмиғанлиқи, униң лагерлар һәққидики сөзиниң бөһтан икәнликини илгири сүргән. Униң тәкитлишичә америка сайрагүл саутбайни мукапатлап, «униң җинайи қилмишини риғбәтләндүргән.» 

Сайрагүл саутбай илгири хитайниң моңғулкүрә наһийәисидики бир җаза лагерида йетәкчи болған. У, 2018‏-йили қазақистандики аилиси билән җәм болуш үчүн қазақистан чеграсидин қанунсиз өтүп, қазақистан һөкүмитидин панаһлиқ тилигән. Лекин, униң панаһлиқ илтимаси рәт қилинған. Бу җәрянда у лагерда йүз бәргән қорқунчлуқ кәмситиш вә хорлаш қилмишлирини дуняға ашкарилап, зор ғулғула қозғиған. Униң шаһитлиқи дуняниң диққитиниң лагерларға бурулушида муһим рол ойниған. Шветсийә өткән йили сайрагүл саутбайға панаһлиқ берип, уни аилиси билән шветсийәгә елип кәлгәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.