Қазақистанға қечип чиққан тоққузтаралиқ қазақ аял лагердики басқунчилиқ вәқәсини ашкарилиди

Мухбиримиз әркин
2019.09.23
Share on WhatsApp
Share on WhatsApp

2018‏-Йили5‏-айда қазақистанға қечип чиққан қайшә ақан исимлик тоққузтаралиқ бир қазақ тиҗарәтчи аял радиомизда өзиниң қазақистанға қечип чиқиши вә тоққузтарадики бир қизниң лагерда басқунчилиққа учрап һамилидар болуп қалғанлиқини илгири сүрди.

Лагерда аял тутқунларниң басқунчилиққа учраватқанлиқиға даир учурлар бурун тарқалған болсиму, лекин һазирға қәдәр һечким бундақ бир вәқәгә ашкара гуваһлиқ берип бақмиған иди. Қайшә ақанниң 21‏-сентәбир күни радиомиз хитай бөлүминиң мухбириға билдүрүшичә, у уйғур или-қазақистан оттурисида қатнап сода қилидиған тиҗарәтчи болуп, у өткән йили 5‏-айниң 4‏-күни йәрлик сақчилар тәрипидин сорақ қилинған. Сақчилар униң паспортини 3 күн ичидә тапшуруп беришини тәләп қилған икән. Қайшә ақан радиомизға бәргән учурида буниң өзидә әндишә қозғиғанлиқи, шуниң билән бу 3 күн ичидә қазақистанға қечип чиқип, панаһлиқ тилигәнликини билдүргән. 

Қайшә ақанниң бу ишларни немә үчүн бир йил 4 айдин кейин ашкарилиғанлиқи бизгә намәлум. Әмма қазақистандики “ата юрт” намлиқ кишилик һоқуқ тәшкилатиниң радиомизға билдүрүшичә, қайшә ақан бу тәшкилатниң ярдимидә өткән һәптә өзиниң кәчүрмишини ашкарилашни қарар қилған икән. У радиомизға бәргән учурида өзиниң дәһшәтлик бир трагедийәгә шаһит болғанлиқи, у тонуйдиған кичик бир қизниң лагердин қоюп берилгәндә йеңи туғулған бир бовақ балини елип чиққанлиқи, һалбуки, униң лагерда басқунчилиққа учрап, бу боваққа һамилидар болуп қалғанлиқини билдүргән.

“атаюрт” тәшкилатиниң илгири сүрүшичә, нөвәттә қайшә ақан қазақистанда сиясий панаһлиқ мәсилисигә дуч кәлгән. Қазақистан һөкүмити өткән йили қайшә ақанға охшаш қазақистанға қечип чиққан сабиқ лагер оқутқучиси сайрагүл саутбайға панаһлиқ беришни рәт қилған. Сайрагүл саутбайға бу йил 6‏-айда шветсийә панаһлиқ бәргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.