Gu'angju sheherlik 75-ottura mekteptiki 10 neper Uyghur oqughuchi tutup kétilgen

Bu yilliq aliy mektepke kirish émtihani axirliship aridin ikki kün ötkende, yeni 6-ayning 9-küni da'iriler gu'angju sheherlik 75-ottura mektepning “Shinjang sinipi” da oquydighan 10 neper Uyghur oqughuchisini tutqun qilghanliqi melum.

Radiyomizning xitayche bölümi éniqlighan uchurlargha qarighanda, gu'angju saqchi da'irilirining bu qétimliq tutqunida 8 oghul, 2 qiz oqughuchi qolgha élin'ghan. Adwokat tang ependining gu'angju sheherlik birinchi tutup turush ornidin élip chiqqan melumatigha qarighanda, tutqun qilin'ghan 10 neper Uyghur ottura mektep oqughuchisining hemmisi “Térror gumandarliri” süpitide tutup turulmaqtiken.

Igilinishiche, gu'angjudiki kishilik hoquqni himaye qilghuchi zat tang shingling bu yilning béshida “Dölet hakimiyitini aghdurushqa qutratquluq qilish jinayiti” bilen eyiblinip, 5 yilliq muddetlik qamaq jazasigha höküm qilin'ghan. Uning adwokati gé yungshi 6-ayning 9-küni gu'angju sheherlik birinchi tutup turush ornigha bérip, mehbus tang shingling bilen körüshken. Tang ependi bu pursette adwokat gé yungshigha ehwal melum qilip, özi bilen bir kamérgha qamalghan kamérdishining abdulla isimlik Uyghur oqughuchi ikenlikini, uningdin gu'angju sheherlik 75-ottura mektepte oquydighan 10 neper Uyghur oqughuchining tutqun qilin'ghanliqi heqqidiki xewerni anglighanliqini yetküzgen. Buning bilen bu xewer dunyagha ashkara bolghan.

Dunya Uyghur qurultiyining bayanatchisi dilshat réshit bu heqte inkas qayturup, gu'angju saqchi da'iriliri tutqun qilghan 10 neper Uyghur oqughuchining teqdiridin qattiq endishe qiliwatqanliqini bildürdi.