Шөһрәт закирниң қуруқ шоари шинҗаң университетини тәрәққий қилдураламду?

Хитай таратқулириниң хәвәр қилишичә, уйғур аптоном райониниң рәиси шөһрәт закир 28-июн күни шинҗаң университетини көздин кәчүргәндә, хитай рәиси ши җинпиңниң йеңи дәвр сотсиялизм идийәси вә хитай компартийәсиниң маарип йетәкчи идийәсини қорал қилип, “иккидә биринчи қатарға өтүш” қурулушини илгири сүрүшни тәкитлигән.

Хитай һөкүмити оттуриға қойған “иккидә биринчи қатарға өтүш” қурулуши, “биринчи қатардики алий мәктәп, биринчи қатардики илим-пән” қурулуши болуп, хитайниң кәлгүси йүз йилда дуняда илим-пән саһәсидә биринчи қатарға өтүш вә хитай арзусини әмәлгә ашуруш пиланини көрситидикән.

Анализчиларниң қаришичә, биринчи қатардики алий мәктәп, биринчи қатардики илим-пән хитай компартийәсиниң мустәбит түзүми, чирикләшкән җәмийити вә қуруқ шоари билән әмәлгә ашмайду, бәлки демократик, әркин, сағлам җәмийәттә әмәлгә ашиду. Бу нуқтидин ейтқанда, шөһрәт закир тәкитлигән ши җинпиң идийәси вә компарийәниң йетәкчи маарип идийәси улар өзлири дәватқан “иккидә биринчи қатарға өтүш” қурулушиға тамамән зит болуп, у хил идийә билән шинҗаң университетини гүлләндүрүш у яқта турсун, бәлки уни сепи өзидин партийә мәктипи қилип қуруп чиққили болидикән.