Иқтисадшунас маршал арбак хитайниң сода урушида уттурғанлиқини илгири сүрди

Мухбиримиз шөһрәт һошур
2018-10-31
Елхәт
Пикир
Share
Принт

Бүгүн «асия вақти» гезитидә мақалә елан қилған иқтисадшунас маршал арбак (Marshal Auerback) нөвәттә америка билән хитай оттурисида давамлишиватқан сода урушида хитайниң уттурувәткән тәрәп болуп қалғанлиқини оттуриға қойған.

Мақалида дейилишичә, хитайниң бу йиллиқ 3‏-пәсилдики иқтисадий йүксилиш нисбити 6.5 Пирсәнт болған болуп, 2017‏-йилидин буянқи әң төвән балдаққа чүшкән. Америка иқтисади болса шиветсарийәдики бир нопузлуқ тәтқиқат орниниң илмий баһалишида қайтидин дуня бойичә иқтисадий риқабәт иқтидари әң юқири болған 10 дөләтниң биринчиси болуп баһаланған.

Маршал арбәкниң бүгүнки мақалисидә әскәртилишичә, бу сан хитай һөкүмәт тәрәп өзи елан қилған сан болуп, хитай тәрәпниң истатестика ишлирида тәшвиқатчилиқ қилиш, рәқәмләрни өзгәртиш әнәниси көздә тутулидиған болса хитай иқтисадиниң бу йиллиқ йүксилиш нисбитидики әмәлий рәқәм 6.5 Пирсәнттинму төвән болуши мумкин икән. Аптор бу мақалисидә хитай тәрәпниң иқтисадий җәһәттики бир қатар тәдбирлириниң карға кәлмигәнликини, әмдиликтә уларниң доналд трамп һөкүмитиниң оттура мәзгиллик сайламда тәхттин чүшүшини вә униң орниға демократик партийәдин бириниң һакимийәт бешиға чиқишни үмид қиливатқанлиқини ишарәтлигән.

Мақалида хитай тәрәпниң пул қиммитини давамлиқ һалда монопол қилиш, америкидин мустәсна бир сода иттипақи шәкилләндүрүш арқилиқ нөвәттики сода урушида ғалип кәлмәкчи болуватқанлиқи, әмма буниң қисқа муддәт ичидә әмәлгә ашурғили болидиған бир лайиһә әмсәлики илгири сүрүлгән. Аптор мақалисидә йәнә әгәр доналд трамп һөкүмити нөвәттики сода урушида иқтисадий тәдбирлирини чәктин ашурувәтсә, NATO вә дуня сода тәшкилатидики иттипақдашлирини қачуруп қоюш еһтималиниң туғулидиғанлиқи, иқтисадий риқабәттә америкиниң «биринчи» әмәс, бәлки «ялғуз» орунға чүшүп қалидиғанлиқи әскәртилгән.

Пикирләр (0)
Share
Толуқ бәт