Хитай даирилири бу йил йәнә уйғурларни "тавуз чағини" өткүзүшкә уюштурған

Мухбиримиз әркин
2021-09-20
Share

Хитай даирилири бу йил йәнә уйғурларни кәң көләмлик хитайниң әнәниви миллий байрими болған "тавуз чағини" ни өткүзүшкә уюштурған. Хитай таратқулириниң ашкарилишичә, хитайниң 21-сентәбир йетип келидиған "тавуз чағини" һарписида уйғур елиниң җәнубий вә шималидики йеза-кәнтләрдә төвәнгә чүшкән хизмәт әтрәтлири йәрлик мусулман хәлқләрни хитайниң мәзкур байримини күтүвелиш үчүн һәр хил паалийәтләргә тәшкилләнгән.

"шинҗаң гезити" ниң бу һәқтики бир хәвиридә, хотәнниң җия йезисидики бир кәнткә чүшкән хизмәт әтритиниң шяв фамилилик бир муавин әтрәт башлиқи бу кәнттә 17-сентәбир өткүзүлгән паалийәттә "хизмәт әтритидикиләр билән кәнт аһалисиниң бирликтә айтоқач ясиғанлиқи", паалийәтниң "наһайити мәнилик" ‍өткәнликини илгири сүргән.

Хитай һөкүмити 2017-йили башланған вә бәзи ғәрб дөләтлири тәрипидин "ирқий қирғинчилиқ" дәп қаралған чоң тутқун билән бир вақитта, уйғур вә башқа мусулманларниң диний һәм миллий байрамлирини чәкләп, уларни хитайниң "тавуз чағини", "баһар байрими" дегәндәк миллий байрамлирини өткүзүшкә уюштуруп кәлгән.

Даириләр бу паалийәтләрни уйғурлар билән хитайлар арисидики "қошмақ туғқанчилиқни күчәйтиш вә техиму чоңқурлаштуруш" намида қанат яйдурулуп кәлгән. Бирақ уйғур тәшкилатлири хитайниң уйғурларни "чаған" вә "тавуз чағини" дәк байрамларни күтүвелишқа мәҗбурлиши униң уйғурларға қарита елип барған "ирқий қирғинчилиқи" вә ассимилятсийә һәрикитиниң парчиси икәнликини илгири сүрүп кәлди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт