باڭكوكتىكى پارتلاشقا چېتىشلىق دەپ تۇتۇپ تۇرۇلۇۋاتقان ئىككى ئۇيغۇر گۇماندارنىڭ داۋاسى يەنە ئارقىغا سۈرۈلدى

مۇخبىرىمىز ئىرادە
2016-09-15
Share

فىرانسىيە ئاگېنتلىقىنىڭ خەۋەر قىلىشىچە، 2015-يىلى 8-ئايدا يۈز بەرگەن بومبا ھۇجۇمىدىن كېيىن قولغا ئېلىنغان مىرئەلى يۈسۈپ، مۇھەممەد بىلاللارنىڭ پەيشەنبە كۈنى ئېچىلماقچى بولغان سوتى تەرجىمان سەۋەبىدىن كېچىكتۈرۈلگەن.

خەۋەردىن قارىغاندا، سوتتا مىرئەلى يۈسۈپ سوت تەرىپىدىن تەيىنلەنگەن ئۆزبېك ئايال تەرجىماننىڭ گېپىنى تولۇق چۈشىنەلمىگەنلىكىنى ئېيتقان. بۇنىڭ بىلەن سوتچى ئۇلارنىڭ سوتىنى 10-ئاينىڭ 13-14-كۈنلىرىگە سۈرۈشنى قارار قىلغان. ئۇلارنىڭ داۋاسى ئۆتكەن 8-ئايدىمۇ يەنە تەرجىمان سەۋەبىدىن سۈرۈلگەن ئىدى.

خەۋەردە ئېيتىلىشىچە، ھەربىي سوتتا كۆرۈلۈۋاتقان بۇ داۋادا سوتچى ئىلگىرى ئاقلىغۇچىلار تەرىپىدىن تەۋسىيە قىلىنغان تەرجىماننى ئىشلىتىشنى رەت قىلىپ، بۇ داۋانىڭ خەۋپسىزلىككە چېتىلىدىغان مەسىلە ئىكەنلىكىنى، شۇڭا چوقۇم سوت ئۆزىنىڭ تەرجىمان تەيىنلەيدىغانلىقىنى ئېيتقان ئىكەن.

مىرئەلى يۈسۈپ ۋە مۇھەممەد بىلال ھەر ئىككىلىسى ئۆزلىرىنىڭ گۇناھسىزلىقى، ۋەقە بىلەن ئالاقىسى يوقلۇقىنى ئىلگىرى سۈرۈپ كەلمەكتە. باڭكوك ھۆكۈمىتىنىڭ داۋا ئۈستىدىكى پەرقلىق ئىپادىلىرىمۇ ئىلگىرى تۈرلۈك گۇمانلارغا يول ئاچقان.

خەۋەردە ئېيتىلىشىچە، خەلقئارا سوتچىلار كومىتېتىنىڭ ئاسىيا دىرېكتورى سەم زارىفى، «بۇ دېگەن تايلاند ھۆكۈمىتى ئۈچۈن ئىنتايىن مۇھىم بىر دېلو ھېسابلىنىدۇ. دېلو گۇماندارلىرى سوتسىز تۇتۇپ تۇرۇلۇۋاتقان بىر شارائىت ئاستىدا، تايلاند ھۆكۈمىتىنىڭ تەرجىمان تەيىنلەيدىغان نەچچە ئاي ۋاقتى بار تۇرۇقلۇق، نېمىشقا كېرەكلىك تەرجىماننى تەييارلىيالمىغانلىقى بىر مۈجمەل ئەھۋال» دېگەن.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت