Amérika xitayning “Tému” tor bazirini Uyghur mejburiy emgiki seweblik tekshürmektiken

Amérika ana weten xewpsizlik ministirliqi xitayning “Tému” tor bazirini Uyghur mejburiy emgiki bilen ishlepchiqirilghan mehsulatlarni amérika bazirida sétiwatqanliqi, “Uyghur mejburiy emgikining aldini élish qanuni” gha xilapliq qilghanliqi, shundaqla abuntlarning shexsiy uchurlirini oghrilawatqanliqi sewebidin tekshürmekte iken.

“Nyu-york pochtisi” gézitining xewer qilishiche, hökümet emeldarliri we istixbarat mutexessisliri “Tému” ning riqabet qilghusiz derijidiki erzan bahaliq mehsulatlarni amérika bazirida sétip, adaletsiz riqabettin paydiliniwatqanliqi, abuntlarning shexsiy uchurlirini oghrilawatqanliqi, shundaqla uning erzan bahaliq mehsulatlarni bazargha sélishta qulluq emgikidin paydiliniwatqanliqini éytqan. Xewerde, amérika ana weten xewpsizliki ministirliqining yuqiri derijilik bir emeldari “Tému” ning tekshürülüwatqanliqini delilligenliki, emma baydén hökümitining “Tému” gha qarita téxi birer tedbir qollanmighanliqi tekitlen'gen.

“Tému” 2022-yili amérika bazirigha échilghandin béri, amérika we yawropa bazirida kiyim-kéchektin achquch we a'ile jahazlirighiche bolghan xilmuxil mehsulatlarni sétip kelmekte. “Nyu-york pochtisi” ning qeyt qilishiche, “Tému” 25-noyabir küni bir “Aliy süpetlik toshqan yungi ediyali” ni 12. 05 Dollargha satqan bolup, uning bahasi amazon tor baziridiki oxshash mehsulatning bahasining üchtin bir qismidinmu erzan iken. Xewerde, “Tému” ning mehsulatlirining “Guman qilarliq” derijide erzan bolushining amérika emeldarlirini chöchütüwatqanliqi, buning yene “Qandaqmu mumkin bolidu” dégen so'al peyda qilghanliqi, bir sabiq amérika istixbarat emeldarining “Buning peqet erzan bahaliq paxta hem emgek küchi bilenla mumkin bolidighanliqi” ni bildürgenliki tekitlen'gen. Bu emeldarning “Biz heyran qalarliq derijide ‛tému‚ ishletken paxtining shinjangdin kelmigenlikini ‛tému‚ning özi békitishige yol qoymaqtimiz” dégen.

Xewerde qeyt qilinishiche, nöwette mutexessisler “Tému” ning mehsulatlirigha qaritamu DNA liq edliye tekshürüshi élip bérilishini telep qilmaqta iken.