Тәйвән президенти тәйвән армийәсиниң һәрбий маневириға қатнашти

Мухбиримиз әркин
2018-04-13
Share

Хитай рәиси ши җинпиң пәйшәнбә күни хитай деңиз армийәсиниң җәнубий деңизда өткүзгән һәрбий паратиға қатнашқан. Бир күндин кейин тәйвән президенти сәй йиңвен тәйвән армийәсиниң һәрбий маневириға қатнишип униңға қоманданлиқ қилди.

Чәтәл ахбарат васитилириниң хәвәрлиридә президент сәй йиңвенниң бу арқилиқ ши җинпиң билән риқабәтләшкәнликини билдүргән. Лекин ройтерс агентлиқиниң қәйт қилишичә, сәй йиңвен мухбирларниң бу һәқтики соаллириға җаваб берип, буни «артуқчә ойлап кәткәнлик» дегән. Бу сәй йиңвенниң 2016‏-йили президентлиқ орниға олтурғандин буян тунҗи қетим тәйвәнниң һәрбий маневириға иштирак қилиши икән.

Униңдин бир күн бурун, йәни пәйшәнбә күни ши җинпиң җәнубий деңизда хитай армийәсиниң зор көләмлик деңиз вә һава бирләшмә һәрбий паратини көздин көчүрүп, игилик һоқуқи тала-тартиштики бу районда өзиниң һәрбий күчини көз-көз қилған.

Ройтерс агентлиқиниң билдүрүшичә, тәйвән армийәсиниң бирләшмә һәрбий маневирида раст оқ ишлитилмигән. Хитай һәрбий даирилири келәр чаршәнбә күни тәйвән боғузида өткүзүлидиған һәрбий маневирда раст оқ ишлитилидиғанлиқини елан қилған иди.

Сәй йиңвен тәйвән армийәсиниң «суав» намлиқ уруш парахотиға чиқип, һәрбий маневирға шу йәрдин қоманданлиқ қилған. У маневирдин кейин қилған сөзидә «бизниң пуқралиримиз армийәмизниң дөлитимизни мудапиә қилиш вә қоғдаш ирадисидин хатирҗәм болсун,» дегән.

Сәй йиңвен тәйвәнниң президентлиқ вәзиписигә олтурғандин бери хитайниң тәйвәнгә болған бесими вә тәһдити давамлиқ еғирлишип барди.

Америка дөләт ишлири министирлиқи пәйшәнбә күни хитайниң тәйвән боғузида өткүзидиған һәрбий маневириға инкас билдүрүп, һәр қандақ бир тәрәпниң қорал күчи яки башқа һәрқандақ усулда тәйвән боғузиниң һазирқи һалитини өзгәртишигә қарши туридиғанлиқини агаһландурған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт