Хитай армийиси тәйвәндики сайламдин кейинла һәрбий маневир өткүзгән

Хитайниң мәркизи телевизийә истансиси хитай армийисиниң шяменда турушлуқ қисимлириниң “йеқинда” һәрбий маневир өткүзгәнликини хәвәр қилған, әмма хәвәрдә маневирниң зади қайси күни қилинғанлиқи ениқ тилға елинмиған.

Ройтерс агентлиқиниң ейтишичә, тәйвәндики президентлиқ сайлими йеңи аяғлишип турушиғила, хитай телевизийисиниң тәйвәнниң контроллуқидики кинмен арилиға интайин йеқин җай болған шяменда һәрбий маневир өткүзгәнлик һәққидә хәвәр тарқитиши диққәт қозғиған.

Тәйвән мудапиә министирлиқиму хитай армийисиниң шяменда һәрбий маневир қилғанлиқини дәлиллигән. Тәйвәнниң чоң қуруқлуқ билән болған мунасивәтлиригә мәсул министирлиқиниң муавин министири ситив лин сөзидә “бу интайин яман хәвәр, у һалда бизму у йәргә көпләп һәрбий орунлаштуримиз. Ақивәттә, тинчлиқни сақлаш үчүн һәр икки тәрәп ортақ күч чиқириши керәк” дегән.

Исмини ашкарилашни халимиған бир тәйвәнлик һәрбий әмәлдар ройтерсқа қилған сөзидә, һәрбий маневир хәвириниң бәлким тәйвәнгә қилинған “психик уруш” болуши мумкинликини, уларниң бу арқилиқ йеңи тәйвән һөкүмитини еһтият билән қәдәм елиш һәққидә агаһландурмақчи болғанлиқини ейтқан.

Өткән шәнбә күни тәйвәндә өткүзүлгән президент сайлимидин кейин, тәйвән демократийини илгири сүрүш партийисиниң лидири доктор сәй йиңвен зор көпчилик авазға еришип, тунҗи аял президент болған иди.