Тибәт сәргәрданлири хитайниң тибәт муритлириниң һиндистанға берип диний паалийәткә қатнишишини чәклигәнликини әйиблиди

Мухбиримиз әркин
2017-01-06
Елхәт
Пикир
Share
Принт

Тибәт сәргәрданлири хитайниң тибәт муритлириниң һиндистанға берип диний паалийәткә қатнишишини чәклигәнликини әйиблиди

Сүргүндики тибәт һөкүмити хитай даирилириниң тибәтләрниң һиндистанға берип, далай ламаниң риясәтчиликидики дуня будда йиғиниға қатнишишини чәклигәнликини тәнқид қилди.

Тибәт сәргәрдан тәшкилатлириниң қәйт қилишичә, мәзкур диний йиғинға қатнишиш үчүн миңлиған тибәтлик буддист мурити һиндистанға барған. Әмма хитай һөкүмити тибәт мухлислириниң юртидики уруқ-туғқан, аилә-тавабиатлириға бесим ишлитип, уларни йиғинға қатнашмай қайтип келишкә мәҗбур қилған.

Хитай һөкүмити илгири уйғурларға бу хил усулни қолланған. Даириләр мисир, түркийә қатарлиқ дөләтләргә оқушқа чиққан уйғур оқуғучиларни яки тарқақ һәҗгә барған уйғурларниң юртидики уруқ-туғқан, аилә-тавабиатлириға бесим ишлитип, уларни қайтип келишкә мәҗбур қилған әһваллар йүз бәргән иди.

Һиндистанниң дарамсала районидики тибәт сүргүн һөкүмитиниң учур-хәлқара алақә ишлар муавин министири наваң томи җүмә күни хитайни тәнқидләп, «биз хитай һөкүмитини хитай чеграси ичидики тибәтләрниң диний әркинликини чәкләшни тохтитишқа чақиримиз. Б д т вә хәлқара җәмийәтни хитай чеграси ичидики тибәтләрниң ғәзәплик садасиға қулақ селишқа үндәймиз» дегән.

34‏-Нөвәтлик мәзкур хәлқара буддизм паалийити тәшкили комитетиниң мәсули карма геләк ютокниң фирансийә агентлиқиға бәргән учурида билдүрүшичә, 7 миң буддист мурити хитайниң бесимида юртиға қайтип кәткән. Һиндистанниң бихар штатида 2‏-январ башланған мәзкур хәлқара диний йиғилиш 14‏-январ ахирлишиду.

Пикирләр (0)
Share
Толуқ бәт