Donald tramp: “Sotsiyalizm bilen kommunizm peqetla hökümran sinipning imtiyazidin bashqa nerse emes”

Xitay hökümitining dunyagha hökümran bolushtiki atalmish “Junggo chüshi” xelq'arada, jümlidin amérikada küchlük inkasi qozghawatqanliqi melum bolmaqta.

24-Séntebir birleshken döletler teshkilatining nyo-yorktiki bash shtabida échilghan 74-qétimliq omumiy yighinida amérika prézidénti tramp sotsiyalizm we kommunizm heqqide söz qilghan. U sözining bashlanmisida “Dölitimiz nöwette duch kéliwatqan eng jiddiy riqabetlerning biri sotsiyalizmning erwahliridur. Sotsiyalizm barliq döletlerning qisaschisi hem jem'iyetning buzghunchisidur,” dep körsetken. 
U yene mundaq dégen: “Sotsiyalizm bilen kommunizm heqqaniyliq yaki barawerlik dégenlik emes. U yene öz nöwitide dölet üchün paydiliq dégenlikmu emes. U peqet birla menini bildüridu, u bolsimu hökümran sinipning imtiyazi.”

Donald tramp sözining axirida amérikaning bir démokratik dölet ikenlikini tekitlep: “Men shuni qayta-qayta tekitleymenki, amérika menggü sotsiyalistik döletke aylanmaydu. Ötken esirde 100 milyon adem sotsiyalizm bilen kommunizmning qurbanlirigha aylandi,” dégen. 

Yighinda gerche donald tramp sotsiyalizm we kommunizm yolida méngiwatqan döletning ismini biwasite atimighan bolsimu, nöwettiki weziyetke nisbeten yuqiriqi sözlerning xitaygha qaritilip déyiliwatqanliqi texmin qilinmaqta.