Җумһурийәтчиләр партийәсиниң пирезидент намзати доналд трамп сайламда ғәлибә қилди

Америкада 5-ноябир күни өткүзүлгән пирезидентлиқ сайлимида җумһурийәтчиләр партийәсиниң пирезидент намзати доналд трампниң утуп чиққанлиқи җәзмләшти.

Бирләшмә агентлиқниң хәвиригә қариғанда, доналд трампниң америка сайлиминиң нәтиҗисигә тәсир көрситидиған һәл қилғуч иштатларда үстүнлүкни игилиши билән пирезидент болуп сайлинип чиқишқа зөрүр болған 270 сайлам белити қолға кәлтүрүлгән.

Американиң 45-нөвәтлик пирезиденти болған, 2020-йиллиқ сайламдики мәғлубийитидин кейин қайтидин сайламға қатнишип ғәлибә қилған сабиқ пирезидент доналд трамп америка тарихида йеңилиқ яратқан пирезидентларниң бири болуп қалди.

Доналд трампниң сайламдики ғәлибиси җәзмлишишкә башлиған дәсләпки минутларда, у филорида иштатиниң ғәрбий палмилиқ саһилида сөз қилип, сайлиғучиларға рәһмәт ейтқан. У сайламдики ғәлибисини америка тарихидики “әң чоң сиясий һәрикәт” дәп атиған. У мундақ дегән: “биз бир тарих яраттуқ, мумкин әмәс дәп қаралған тосалғуларни йәңдуқ”.

Доналд трамп, бу қетимлиқ сайлам нәтиҗисиниң америка тарихида йеңидин “алтун дәвр” ачидиғанлиқини тәкитлигән. У, америкалиқларға мундақ дәп хитаб қилған:

“мән сиз, аилиңиз вә кәлгүсиңиз үчүн күрәш қилимән. Силәр үчүн күрәш қилиштин бир күнму тохтап қалмаймән. Ахирқи нәписимгичә күришимни давамлаштуримән. Мән американи биз вә бизниң кәлгүси әвладлиримизға лайиқ болған күчлүк, бихәтәр вә баяшат қилип чиқмиғучә тохтимаймән!”

У йәнә мундақ дегән: “бу һәқиқәтән американиң алтун дәври болиду. Мана бу биздә болушқа тегишлик нәрсә. Бу бизгә американи қайтидин бүйүк дөләт қилип чиқиш пурсити бәргән америкалиқларниң ғайәт зор ғәлибиси.”

Доналд трамп америка сайлимида һәл қилғуч рол ойнайдиған шималий каролина, җорҗия, пенсилванийә вә висконсин шитатлирида ғәлибә қилған болуп, униң қоллиғучилириниң техи биләт санаш давам қиливатқан аризона вә мишиган қатарлиқ шитатлардиму алдида меңиватқанлиқи мәлум.

Җумһурийәтчиләр партийәси бу қетимлиқ америка пирезидент сайлимидила утуп қалмастин, бәлки йәнә америка кеңәш палатасидиму 52 орунға еришип, үстүнлүкни игилигән. Бу нәтиҗиниң трамп йеқин кәлгүсидә ақсарайға киргәндин кейин униң зор сиясий қарарларни елиши вә иҗра қилишини зор дәриҗидә асанлаштуридиғанлиқи мөлчәрләнмәктә.