Pirézidént trampning yéngi tamozhna béjini yolgha qoyushi xitaygha éghir zerbe béridu dep qaralmaqta

 Pirézidént donald trampning yéngi tamozhna béji, yeni amérikigha kélidighan barliq xitay malliridin 10 pirsent tamozhna béjini qoshup élishi xitaydin amérikagha kiriwatqan fantanilning miqdarini tizginlesh bilen birge, xitay iqtisadigha zerbe béridu dep qaralmaqta. Shuning bilen bir waqitta, trampning xitaydin kélidighan her qandaq öch élishlargha téximu yuqiri tamozhna béji bilen qarshiliq béridighanliqi texmin qilinmaqta.

 “Nyu-york waqti géziti” 3-féwral élan qilghan xewerde déyilishiche, pirézidént donald trampning amérikigha kélidighan barliq xitay malliridin 10 pirsent tamozhna béjini qoshup élishi amérika-xitay sodisida tamozhna béji élinidighan kiyim-kéchek we bashqa mehsulatlarning tamozhna béjining kechürüm qilinishni chekleydiken. Shuningdek 800 dollarghiche bolghan posulka (xalta) larning burunqidek tekshürülmestin we baj qoyulmastin amérikagha kirishige yol qoyulmasliqi xitay iqtisadiy üchün téximu éghir zerbe bolidiken.

 Yéqinda “Iqtisadshunas” zhurnilida élan qilin'ghan bir maqalide, trampning saylam mezgilide xitay malliridin kem dégende 60 pirsent tamozhna béji élishqa wede qilghanliqi, tramp aqsaraygha kirgendin kéyin bolsa, eger xitay, fentanilning amérikigha éqip kirishining aldini almisa xitay malliridin üstilep 10 pirsent baj alidighanliqi körsitilgen idi. Maqalide, eger tramp dégenlirini emeliyleshtürse xitay iqtisadiy üchün éghir zerbe bolidighanliqi, 2025-yilining xitay iqtisadi üchün musheqqetlik yil bolidighanliqi, eger xitay hökümiti buninggha qarshi tedbir almisa xitayning iqtisadining éshish sür'itining 2.4 Pirsent töwenleydighanliqi tilgha élin'ghanidi.

Donald tramp aldinqi nöwetlik pirézidéntliq mezgilide xitaygha qarshi soda urushining piltisini yéqip, xitayning éksport mehsulatlirigha nechche yüz milyard dollarliq tamozhna béji qoyghan idi.