Xitay terep tramp hökümiti bilen hemkarlishish toghriliq arqa-arqidin signal bérishke bashlighan
2025.01.23
Amérikaning yéngi nöwetlik pirézidénti donald tramp resmiy wezipe tapshuruwalghandin buyan, xitay hökümitining amérika bilen hemkarlishish toghrisida arqa-arqidin signal bériwatqanliqi diqqet qozghimaqta.
“Amérika awazi” ning bu heqtiki xewirige qarighanda, donald tramp ikkinchi qétimliq pirézidéntliq wezipisini bashlishi bilen, xitay hökümiti amérika bilen dawamliq qarshilishishning ornigha hemkarliq ornitip, ikki tereplik munasiwetni qolgha keltürüsh arzusida bolmaqtiken.
Xitay tashqi ishlar ministirliqining bayanatchisi go jyakun tramp wezipe tapshuruwalghan küni bergen axbarat bayanatida, “Xitay amérikaning yéngi nöwetlik hökümiti bilen alaqini dawamliq saqlash, öz'ara hemkarliqni kücheytish, ixtilaplarni muwapiq bir terep qilish arqiliq, ikki dölet munasiwitini ilgiri sürüshni xalaydu” dégen.
Pirézidént trampning 20-yanwar küni ötküzülgen wezipige olturush murasimigha qatnashqili kelgen xitayning mu'awin re'isi xen jéngmu amérikaning yéngi nöwetlik mu'awin pirézidénti j d wens bilen uchriship, xitayning amérika bilen hemkarlishishni xalaydighanliqini bildürgen. U, amérika soda sahesidiki shexsler bilen uchrashqanda, ularni “Xitaygha meblegh sélishqa we hemde ikki dölet otturisida köwrüklük rol oynashqa” chaqirghan.
Bir qisim közetküchilerning “Amérika awazi” gha bildürüshiche, béyjing da'iriliri nöwette “Amérika terep bilen uchrishish we pikir almashturush arqiliq ikki terep otturisidiki uqushmasliqni azaytish ümidini ochuq ipade qilmaqta iken. Téximu éniqraqi, xitay terep pursetni ching tutup, tramp hökümiti bilen bolghan deslepki uchrishishlar arqiliq ikki tereplik munasiwetni, téximu muhimi trampning xitaygha qoyidighan jaza tedbirlirini yenimu kücheytiwétishidin saqlanmaqchi” iken.
Xewerde déyilishiche, xitay hökümiti tramp hökümiti bilen hemkarlishishni xalaydighanliqini bildürüwatqan bir peytte, donald tramp xitay, méksika we kanadadin import qilin'ghan tawarlargha tamozhna béjini östürüshni waqtinche toxtatqan bolsimu, emma u öz waqtida yene amérika soda wekilidin xitayning 2020-yili imzalan'ghan “1-Basquchluq” soda kélishimige emel qilghan-qilmighanliqini tekshürüsh heqqide buyruq bergen. Tramp yene, eger xitay TikTok mesiliside bir yekün'ge kelmise, xitay mehsulatlirigha tamozhna béji qoyidighanliqi toghriliq tehdit salghan.