Türk putbolchi alp'aslan xitayning teklipini ret qilghan

Muxbirimiz méhriban
2015.06.30

30-Iyun küni türkiye qatarliq döletlerdiki xelq'ara metbu'atlar we ijtima'iy taratqularda, türkiyening 22 yashliq putbol cholpini alp'aslan öztürkning “Uyghurlargha yardem” telipining uning xitay bilen bolghan toxtamining buzulushigha seweb bolghanliqi heqqidiki xewer tarqilip munazire qozghidi.

Türkiye t r t radi'osining xewer qilishiche, türkiyediki qasimpasha putbol komandisidin ayrilghan türkiye döletlik putbol komandisi ezasi alp'aslan öztürk, xitaydiki ikki putbol komandidin özige teklip kelgenlikini, ulargha alidighan ma'ashining 10% ni Uyghurlargha yardem qilghusi barliqini éytqanda, bu putbol komandilirining özi bilen toxtam tüzüshtin derhal waz kechkenlikini bildürgen.

Xewiride yene “Qasimpasha putbol komandisidin ayrilghandin kéyin, xitay birleshme putbol komandiliridin telep alghan alp'aslan öztürkning Uyghurlargha yardem qilish telipi, toxtamning buzulushigha seweb boldi.” dégen bayanlar bérilgen. Ijtima'iy alaqe wasitiliridin féysboktiki türkiye putbol cholpini alp'aslan öztürk féysbo'ok torida özining bu qarari heqqide toxtilip: “Ular waz kechse kéchiwersun, biz risqimizni her yerdin tapimiz, Uyghurlar bir parche nan'gha zar bolup yashimaqta, allah ulargha yardem qilsun” dep yazghan.

Alp'aslan öztürk 1993-yili 16-iyulda bélgiyede tughulghan bolup, en'gliyede uzun yil putbol meshiq qilghan. 2012-Yili bélgiyege qaytip kelgen alp'aslan be'erschot we standart li'ege putbol komandilirida oynighandin kéyin, 2014-yili türkiyediki qasimpasha putbol komandisigha kirgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.