Түркийәдә көп санда оттура асиялиқлар ишлимәктә

Мухбиримиз үмидвар
2017-01-18
Share

Истанбулдики рейна кәчлик кулубиға қилинған террорлуқ һуҗумчисиниң оттура асиялиқ болуши түркийә мәтбуатлирида оттура асиялиқлар һәққидики мәлуматларни вә инкасларни оттуриға чиқармақта.

Түркийә мәтбуатлиридин "хәвәр түрк" түркийә әмгәк вә иҗтимаий параванлиқ министирлиқидин учур игиләп, 2016-йили түркийәдә 73 миңдин артуқ чәтәлликкә ишләш рухсити берилгәнликини хәвәр қилди.

Фәрғанә учур ториниң түрк хәвәр мәнбәлири асасида қәйт қилишичә, 2016-йили түркийәдә ишләш рухситигә еришкәнләр ичидә оттура асиялиқларниң саниму хели көп икән, қәйт қилинишичә, 3474 нәпәр түркмәнистанлиқ, 1435 өзбекистанлиқ, 3049 қирғизистанлиққа түркийәдә ишләш һоқуқи берилгән.

Лекин, түркийә оттура асия җумһурийәтлиригә визисиз түзүм йолға қойғанлиқи үчүн көплигән оттура асия дөләтлири пуқралири халиғанчә түркийәгә келип мәлум вақит туруш һоқуқиға игә икән, қанунлуқ ишләш рухситигә еришкәнләрдин башқа хели көп салмақни қанунсиз туруп ишләйдиғанлар игилигән.

Хәвәрдә дейилишичә, 2016-йили ишләш рухсити алғанларниң әң көпи сүрийәликләр, униңдин кейин қалса грузийәликләрдур.

Муһим нуқта шуки, мәзкур хәвәрдә өткән йили 4397 нәпәр хитай пуқрасиниң ишләш рухсити алғанлиқини язған болсиму, әмма буларниң миллий кимлики һәққидә һечнемә дейилмигән.

Мәлумки, оттура асиялиқлар әң көп баридиған дөләт русийә болуп, тәхминән үч милйонға йеқин өзбекистанлиқ, бир милйон әтрапида қирғизистанлиқ вә таҗикистанлиқ русийәдә қанунсиз туруп вә ишләп аилисини қамдимақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт