Türkiye hökümiti türk wetendashliqigha ötken Uyghurlarning öz kimlikide tughulghan yurtini yézishigha yol qoyidiken

Türkiye jumhuriyiti ichki ishlar ministirliqi yéqinda mexsus belgilime chiqirip, türkiye wetendashliqigha ötken Uyghurlarning pasport we kimlikide tughulghan yurtini yézishigha yol qoyidighanliqini bildürgen.

Melumki, xitay da'irilirining Uyghurlargha béjirgen pasportlirida shexslerning tughulghan yérini birdek “Xitay” yaki “Shinjang” dégen namlar bilen yézishi muhajirettiki Uyghurlarning küchlük naraziliqini qozghap kelgen idi.

Yéqinda türkiye ichki ishlar ministirliqi bu heqte uqturush chiqirip, türkiye puqraliqigha ötken Uyghurlarning pasport we kimlikidiki tughulghan yérini özining kindik qéni tökülgen ana yurtining namlirigha özgertse bolidighanliqini élan qilghan. Yeni türkiye puqraliqigha ötken herqandaq Uyghur ilgiriki kimlik kartisidiki “Tughulghan yéri” dégen katekchige mejburiy yézilghan “Chin” yaki “Shinjang” dégen namlarni öchürüp, uning ornigha özi tughulghan yurtning namlirini, mesilen, qeshqer, xoten, ürümchi yaki ghulja dégendek Uyghurche yer namlirini yazsa bolidiken.

Közetküchiler, türkiye hökümitining bu qarari, muhajirettiki Uyghurlarning pasport we kimlikliride xitay hökümiti teripidin mejburiy xitaylashturulghan isim-famile we yurt namlirini eslige keltürushtiki bir ijabiy qedem, dep qarimaqta.