Qeshqer uniwérsitétida atalmish “Shinjang tarixi” boyiche “Üch ezeldin” teshwiqat léksiyisi uyushturulghan
2016.08.29
Qeshqer uniwérsitétida atalmish “Shinjang tarixi” boyiche “Üch ezeldin” teshwiqat léksiyisi uyushturulghan
Xitay hökümet tarixshunasliri 70 yildin buyan bazargha sélip kéliwatqan xitay tarix kitabliridiki “Ezeldin” nezeriyisi bügünki künde chet'ellerdiki xitay tarixchilirining, hetta xitay chong quruqluqidiki bir qisim ilmiy tetqiqatchilarning küchlük tenqidige duch kelmekte.
Mana mushundaq bir shara'itta qeshqer uniwérsitéti da'irilirining atalmish “Shinjang tarixi” boyiche “Üch ezeldin” nezeriyisini kötürüp chiqishi we bu heqte teshwiqat léksiyisi uyushturushi küchlük inkas qozghimaqta.
Qeshqer uniwérsitétining tor bétidin melum bolushiche, 26 - awghust chüshtin kéyin qeshqer uniwérsitéti partkomi siyasiy - idiye bölümi atalmish “Shinjangning üch tarixi” boyiche teshwiqat léksiyisi uyushturghan. Mezkur uniwérsitétning siyasiy teshwiqat sözchisi niyazhaji qadir “Shinjang ezeldin junggoning ayrilmas bir qismi”, “Shinjang ezeldin köp millet topliship olturaqlashqan rayon”, “Shinjang ezeldin köp millet birlikte tereqqiy qildurghan rayon” dégen “Üch ezeldin” nezeriyisi boyiche léksiye sözligen.
Xewerde déyilishiche, niyazhaji qadirning léksiyisidin kéyin qeshqer uniwérsitétining oqutquchi we xizmetchiliri “Muqimliq”, “Milletler ittipaqliqi” we “Üch tarix qarishi” boyiche ipade bildürgen.
Közetküchiler, qeshqer uniwérsitéti da'irilirining bu yilliq yéngi oqush yili bashlinish harpisida atalmish “Shinjang tarixidiki üch ezeldin” sepsetisini bazargha sélishi, Uyghur medeniyitining böshüki hésablan'ghan qeshqerde “Ménge yuyush” teshwiqati yürgüzüwatqanliqining bir roshen ipadisi, dep qarimaqta.