Хитайниң учқучисиз һәрбий айрупиланлири пуқраларға сетилмақчи

Мухбиримиз әзиз
2018-04-19
Елхәт
Пикир
Share
Принт

Мәлум болушичә, хитай һөкүмити өткән бирнәччә йилда һәрбий ишлар үчүн ишлитип келиватқан учқучисиз айрупиланни бу йилдин башлап пуқраларниң сетивелишиға болидиғанлиқини елан қилған.

«Еликтронлуқ хитай хәвәрлири» ториниң 19-апрелдики хәвиригә қариғанда, бейҗиңдики «һәсән-һүсән» ширкити ясаватқан бу хилдики айрупиланлар дәсләп болуп базарға селинидикән. Мәзкур ширкәтниң баш инженири ши вен бу һәқтә сөз қилип, «һәрбий қисимларға қариғанда пуқралар бу хилдики айрупиланларни көпрәк сетивалиду, дәп қараймиз» дегән.

Хәвәрдә ейтилишичә, бу қетим базарға селинмақчи болған айрупланлар «терорлуққа қарши күрәштә зор роли бар» дәп қариливатқан һәмдә һәрбий ишлар үчүн ишлитилидиған учқучисиз айрупиланлар асасида лайиһәләнгән икән, әмма униңдики қоралға мунасивәтлик бөләкләр сөкүп еливетилидиған болуп, шәхсий ишларға лайиқлаштуруп ясалған икән.

Хәвәрдин мәлум болушичә, хитай һөкүмити мушу хилдики учқучисиз айрупиланларни уйғур дияридики йәр асти байлиқини қидирип тәкшүрүштә көпләп ишләткән. Шуниң билән биргә 2014-йили йүз бәргән йәкәндики «елишқу вәқәси» диму мушу хилдики айрупиланларниң ишлитилгәнлики һәққидә хәвәрләр тарқалған иди.

Һалбуки, бу айрупиланларниң сетилиш баһаси һәққидә һазирчә һечқандақ учур берилмигән болуп, бу айрупиланларни пулдар хитай содигәрлириниң көпләп сетивелиши мөлчәрләнмәктә икән.

Пикирләр (0)
Share
Толуқ бәт