Xitayning uchquchisiz herbiy ayrupilanliri puqralargha sétilmaqchi

Muxbirimiz eziz
2018-04-19
Élxet
Pikir
Share
Print

Melum bolushiche, xitay hökümiti ötken birnechche yilda herbiy ishlar üchün ishlitip kéliwatqan uchquchisiz ayrupilanni bu yildin bashlap puqralarning sétiwélishigha bolidighanliqini élan qilghan.

"Éliktronluq xitay xewerliri" torining 19-apréldiki xewirige qarighanda, béyjingdiki "Hesen-hüsen" shirkiti yasawatqan bu xildiki ayrupilanlar deslep bolup bazargha sélinidiken. Mezkur shirketning bash inzhéniri shi wén bu heqte söz qilip, "Herbiy qisimlargha qarighanda puqralar bu xildiki ayrupilanlarni köprek sétiwalidu, dep qaraymiz" dégen.

Xewerde éytilishiche, bu qétim bazargha sélinmaqchi bolghan ayruplanlar "Térorluqqa qarshi küreshte zor roli bar" dep qariliwatqan hemde herbiy ishlar üchün ishlitilidighan uchquchisiz ayrupilanlar asasida layihelen'gen iken, emma uningdiki qoralgha munasiwetlik bölekler söküp éliwétilidighan bolup, shexsiy ishlargha layiqlashturup yasalghan iken.

Xewerdin melum bolushiche, xitay hökümiti mushu xildiki uchquchisiz ayrupilanlarni Uyghur diyaridiki yer asti bayliqini qidirip tekshürüshte köplep ishletken. Shuning bilen birge 2014-yili yüz bergen yekendiki "Élishqu weqesi" dimu mushu xildiki ayrupilanlarning ishlitilgenliki heqqide xewerler tarqalghan idi.

Halbuki, bu ayrupilanlarning sétilish bahasi heqqide hazirche héchqandaq uchur bérilmigen bolup, bu ayrupilanlarni puldar xitay sodigerlirining köplep sétiwélishi mölcherlenmekte iken.

Toluq bet