Uyghur élida ündidardiki “Dostlar chembiriki” ni étiwetkenler yaki étiwetmekchi bolghanlarning sani köpeymektiken

Xelq tori Uyghurche qanilining 1-awghusttiki xewirige qarighanda, Uyghur aptonom rayonida ündidardiki “Dostlar chembiriki” ni étiwetken yaki étiwetmekchi bolghanlarni sani körünerlik ashmaqtiken.

Igilinishiche, xelq tori yéqinda Uyghur aptonom rayonidin ündidardiki “Dostlar chembiriki” ni ishlitiwatqan 2000 kishini ziyaret qilghanliqi melum.

Tekshürüsh netijisidin melum bolushiche, 35.8 Pirsent ziyaret qilin'ghuchi ündidardiki “Dostlar chembiriki” étiwetken yaki étiwetmekchi bolghanlar iken.

Xewerde ündidardiki “Dostlar chembiriki” ni étiwetken yaki étiwetmekchi bolghanlarning köpinchisining élan uchurliridin bizar bolghanliqi yaki ündidarning xizmet, turmush we öginishke selbiy tesir élip kelgenliki tilgha élin'ghan. Emma uningdiki bir qisim sezgür siyasiy sewebler peqetla tilgha élinmighan.

Ejeblinerliki shuki, xelq tori élan qilghan mezkur xewerde ündidardiki “Dostlar chembiriki” ni taqiwetmekchi bolghanlargha eng yaxshisi uni dawamliq ishlitish we hazirqi uchur dunyasining ewzellikidin paydilinish teklipi tewsiye qilin'ghan.

Chet'ellerdiki közetküchiler bilen siyasiy analizchilar Uyghur aptonom rayonida ündidarni ishlitidighanlarning, bolupmu ündidardiki “Dostlar chembiriki” ge eza bolghanlar sanining yéqindin buyan jiddiy rewishte peskoygha chüshüshi tor saqchilirining qattiq sénzori bilen munasiwetlik, dep qarimaqta.

Radiyomiz ötken yilidin buyan Uyghur élining herqaysi jaylirida köpligen yashlarning ündidarda diniy mezmundiki yaki sezgür siyasiy témilardiki uchurlarni körgenliki seweblik tutqun qilin'ghanliqigha da'ir neq meydan xewerlirini anglatqan idi.