Үрүмчидә бир қисим мулазимәтләр әслигә кәлтүрүлгән болсиму, карантин тәдбирлири йәнила давамлашмақтикән

24- Ноябир күни үрүмчидә от апити йүз берип, хитайниң қаттиқ юқум қамали сәвәбидин паҗиәлик өлүм вәқәси келип чиққан иди.

Бу вәқә, 4 айдин бери давам қиливатқан хитайниң “юқумни нөлгә чүшүрүш” намидики қаттиқ юқум қамали үрүмчи аһалисини һәр җәһәттин қаттиқ чарчатқан бир мәзгилгә тоғра кәлгән. Буниң билән кәң хәлқ аммисида зор наразилиқ қозғалған. Вәқәдин кейин даириләр, юқум тәдбирлириниң пәйдинпәй әслигә кәлтүрүлидиғанлиқини, 29-ноябирдин башлап үрүмчи шәһиридики кишиләрниң өзлири турушлуқ район тәвәсидә сиртқа чиқса болидиғанлиқини уқтурған.

Хитайниң “тәңритағ тори” 1-декабир күни тарқатқан хәвәрлиридә, үрүмчидә бир қисим ашханилар ечилип өйләргә закас қилинған тамақлар тошулуватқанлиқини, коча аптобуси вә почта йолланмиси қатарлиқ хизмәтлириниң әслигә кәлгәнликини хәвәр қилған. Бирақ райондики юқумланғучилар яки юқумланғанлиқ еһтимали болған кишиләрни мәҗбурий һалда айрип карантинға елиш ишлири йәнила давам қилмақтикән.

Иҗтимаий таратқуларда тарқалған көрүнүшләрдә кишиләрниң давамлиқ һалда интайин начар шараитлардики карантин орунлирида соғуқтин вә ачлиқтин қейниливатқанлиқи көрситилгән.

“тәңритағ тори” 1-декабир күни уйғур елидики юқум әһвалиға аит тарқатқан учурида 30-ноябир күни кечә саәт 24:00 кичә болған арилиқта йәнә 968 йеңи аламәтсиз юқумдар вә 21 нәпәр аламәтлик юқумдар байқалғанлиқини, 1053 нәпәр кишиниң карантиндин қоюп берилгәнликини билдүргән. Мәлум болушичә, буларниң ичидики 85 нәпири үрүмчидики аламәтсиз юқумдарлар икән.

Үрүмчидики от апитидин кейин, хитай йолға қоюватқан чекидин ашқан карантин тәдбирлири хәлқара җамаәтниң күчлүк диққитини қозғашқа башлиған.