Явропа парламенти қарар мақуллап, үрүмчи от апитидә һаятидин айрилғанларниң сани вә һәқиқий әһвалини ашкарилашни тәләп қилди

Мухбиримиз әркин
2022.12.16

Явропа парламенти 15-декабир қарар лайиһәси мақуллап, 24-ноябир ‍үрүмчи от апитидә һаятидин айрилған уйғурлар вә уларниң аилә тавабиатлиридин һал сорайдиғанлиқи, хитай һөкүмитиниң апәттә һаятидин айрилғанларниң сани, уларниң қандақ әһвалда өлгәнликини очуқ-ашкара елан қилишни тәләп қилған.

Явропа парламентиниң қарар лайиһәсидә, үрүмчидики от апитидә һаятидин айрилғанларниң уйғур болушиға диққәт қилғанлиқи, “бу трагедийә явропа парламентиниң шинҗаң уйғур аптоном районида инсанийәткә қарши җинайәт йүз бәрмәктә вә бу ирқий қирғинчилиқ хәвпи тәшкил қилмақта, дәп етирап қилған райондики кәң кишилик һоқуқ қәбиһликлириниң парчиси” икәнлики тәкитләнгән.

Қарар лайиһәсидә мундақ дейилгән: “үрүмчи от апитиниң қурбанлири вә уларниң аилә тавабиатлиридин һал сорайду вә ‍улар билән һәмкарлиқ ичидә икәнликимизни билдүриду. Хитай һөкүмитини зиянкәшликкә учриғучиларниң сани вә уларниң қандақ әһвалда һаятидин айрилғанлиқини очуқ-ашкара елан қилишқа чақириду”.

Қарар лайиһәсидә йәнә, COVID-19 сияситидә хәлқниң һәқ-һоқуқ вә әркинликини қоғдаш билән аммиви сағламлиқни қоғдаш арисида мувапиқ тәңпуңлуқни сақлашниң қийинлиқини етирап қилсиму, лекин хитай хәлқиниң негизлик әркинлик күришидә улар билән биргә туридиғанлиқи, хитайниң нөл ковид сияситидики кишилик һоқуқ дәпсәндичиликлиргә болған әндишилирини ипадиләйдиғанлиқи билдүрүлгән.

Қарар лайиһәсиниң ахирида явропа иттипақи, уйғурларға қаритилған инсанийәткә қарши җинайәттә җавабкарлиқи бар хитай әмәлдарлириға вә аппаратлириға, җүмлидин уйғур аптоном районлуқ партком секретари ма шиңрүй, сабиқ секретари чен чүәнго, хитайниң сабиқ мәркизи сиясити қанун комитети секретари җав кеҗи, сабиқ җамаәт хәвпсизлик министири гу шеңкүн, мәркизи бирликсәп бөлүминиң әмәлдари ху лйәнхе, шундақла “шинҗаң һөҗҗәтлири” дә исми чиққан башқиларға қарита қошумчә ембарго йүргүзүшкә чақирилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.