Хитай һөкүмити америка хәлқара диний әркинлик комитетиниң 4 нәпәр әмәлдариға өч елиш характерлиқ имбарго елан қилған

Мухбиримиз әркин
2021.12.21
Хитай һөкүмити америка хәлқара диний әркинлик комитетиниң 4 нәпәр әмәлдариға өч елиш характерлиқ имбарго елан қилған Хитай һөкүмити америка диний әркинлик комитетиниң рәиси нәдин мианза, муавин рәиси нури түркәл вә комиссарлиридин анурима баргава, җәймис кар қатарлиқ 4 нәпәр әмәлдариға ‍өч елиш характерлиқ имбарго елан қилған
Photo: RFA

Хитай һөкүмити 21-декабир американиң диний әркинлик ишлириға мәсул 4 нәпәр әмәлдариға имбарго қойғанлиқини елан қилған. Бу хитай һөкүмитиниң американиң буниңдин икки һәптә аввал хитайниң уйғурларни бастурушиға қарита йүргүзгән имбаргосиға қарши өч елиш характерлиқ җаза тәдбири икән.

Америка һөкүмити буниңдин икки һәптә илгири уйғур аптоном райониниң мувәққәт рәиси әркин тунияз, сабиқ рәиси шөһрәт закир, хитай “мәркизий шинҗаң хизмити рәһбәрлик ишханиси” ниң муавин дериктори ху лийәнхени өз ичигә алған 4 хитай әмалдариға имбарго қойған иди.

Америка малийә министирлиқи “уларниң вәзипидики мәзгилидә шинҗаңдики уйғурларни асас қилған бир милйондин артуқ мусулман етник аз санлиқ милләт әзалирини тутқун қилиш қилмишида мәсулийити барлиқи” ни билдүргән иди. Бирақ бейҗиң даирилири 21-декабир күни америка хәлқара диний әркинлик комитетиниң рәиси, муавин рәиси вә икки нәпәр комиссариға имбарго қойғанлиқини елан қилған.

Хитай ташқий ишлар министирлиқиниң баянатчиси җав лиҗйәнниң мухбирларға ейтишичә, америка диний әркинлик комитетиниң рәиси нәдин мианза, муавин рәиси нури түркәл вә комиссарлиридин анурима баргава, җәймис кар қатарлиқларниң хитай чоң қуруқлуқи, хоңкоң, макавға кириши чәклинип, уларниң хитайдики мал-мүлки тоңлитилидикән, уларниң хитай пуқралири һәм ширкәтлири билән сода қилиши мәний қиинидикән.

Америка хәлқара диний әркинлик комитети партийәләр һалқиған мустәқил диний әркинликни көзитиш органи болуп, у америка дөләт мәҗлиси вә һөкүмитигә мәсһлиһәт бериш, униң сиясәт түзүшигә ярдәм бериш органидур.  Көзәткүчиләрниң ейтишичә, хитайниң америкадики мәмурий функитсийәси болмиған бу органни нишанға елиши, һечқандақ әмәлий әһмийити болмиған бир симвуллуқ өч елиш урунуши икән . Бу хитайниң хәлқ‍ара диний әркинлик комитетини тунҗи қетим нишанға елиши әмәс. Хитай бу йил 5-айда мәзкур комитетниң сабиқ комиссари җоний морға имбарго қойған. Бу комитет америка һөкүмитиниң хитайниң уйғурларға қаратқан бастурушлирини “ирқий қирғинчилиқ” дәп бекитиши, дөләт мәҗлисиниң уйғурларға алақидар қанунларни чиқириши, хитай әмәлдарлирини җавабкарлиққа тартишни қоллап кәлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.