Xitay xelq qurultiyi tekshürüsh ömiki Uyghur élide aptonomiye qanunining emeliylishishini tekshürmekchi

30-Iyul küni xitay memliketlik xelq qurultiyi teshkilligen mexsus ömek, Uyghur aptonom rayonining aptonomiye qanunining emeliylishishini tekshürüsh üchün ürümchige yétip kelgen.

Xitayning hökümet metbu'atliridin tengritagh torining xewiridin melum bolushiche, bu ömekke xitay memliketlik xelq qurultiyining da'imiy hey'iti, xitay memliketlik xelq qurultiyining milliy ishlar ishxanisining mudiri, merkizi partiye mektipining mu'awin mudiri qatarliq wezipilerni ötewatqan ili jingtyen yétekchilik qilghan. Xewerde yene bu ömekning 30-iyul küni chüshtin ilgiri Uyghur aptonom rayonining emeldarliri bilen élip bérilghan söhbet yighinida, Uyghur aptonom rayonining mu'awin re'isi jarulla hisamidinning Uyghur aptonom rayonida aptonomiye qanunining ijra qilinish ehwali heqqide bergen doklatini anglighanliqi alahide tilgha élin'ghan.

Xitay metbu'atlirining bu qétimqi tekshürüsh heqqide bergen xewerliride, Uyghur aptonom rayonining yéqinqi 30 yilliq tereqqiyatida aptonomiyilik qanunlarning kapaletke ige qilin'ghanliqini, emma yenila bezi mesililer saqlan'ghanliqi üchün merkizi hökümetning bu qétim mexsus ömek teshkillep ewetkenliki eskertildi.

Xitay weziyitini közetküchi analizchilar bolsa, rayonda arqa-arqidin yüz bériwatqan hökümetke qarshi naraziliq heriketliri sewebidin, xitay merkizi hökümiti “Xelq qurultiyining tekshürüsh ömiki” namidiki bu ömekni ewetken bolushi mumkinlikini tekitlimekte.