Amérika we yawropa ittipaqi diplomatlirining qoshma bayanatida, xitayning Uyghurlar rayonidiki qilmishi eyiblendi

Amérika we yawropa ittipaqining yuqiri derijilik diplomatliri ‍ötken hepte qoshma bayanat élan qilip, xitayning Uyghurlar rayondiki qilmishini tenqid qilghan, shundaqla xitayni ukra'ina mesiliside rusiyege yardem bermeslik toghrisida agahlandurghan. Melum bolushiche, amérikaning mu'awin tashqi ishlar ministiri wéndi shérman, eger xitay rusiyening ukra'ina urushigha “Emeli yardem” berse, uninggha émbargo yürgüzidighanliqini bildürgen. Wéndi shérmannbing bashchiliqidiki bir amérika diplomatik ömiki ötken hepte yawropa ittipaqini ziyaret qilip yawropa ittipaqi tashqi ishlar komissariyatining bash katipi stéfano sanino bilen xitay mesilisini öz ichige alghan köp xil témilarda söhbet élip barghan.

Ikki terep 21- we 22-aprél künliri ötküzülgen söhbettin kéyin élan qilghan qoshma bayanatta, xitayning Uyghurlar rayonidiki qilmishini tenqidligen. Taratqularning xewer qilishiche, yawropa ittipaqi tashqi ishlar komissariyati bash katipi stéfano, “Biz yene shinjangdiki weziyetke, bolupmu shu jaydiki keng kölemlik ‛siyasiy qayta terbiyelesh‚ lagérliri tori, keng kölemlik nazaret qilishi herikiti, Uyghur we bashqa az sanliq milletlerning diniy erkinlikini sistémiliq cheklesh, mejburiy emgekke sélish qatarliqlargha köngül bölimiz” dégen.

Qoshma bayanatta, amérika we yawropa ittipaqining xitayni dawamliq xelq'ara jem'iyetning rusiyege yürgüzgen jazasidin ‍özini qachurmasliqqa yaki uninggha buzghunchiliq qilmasliqqa we yaki rusiyege herqandaq shekilde yardem bermeslikke chaqiridighanliqi bildürülüp, rusiyeni qollash özlirining xitay bilen bolghan munasiwitige tesir qilidighanliqi tekitlen'gen. Wéndi shérman mundaq dégen: “Biz xitaygha shuni éniq bildürimiz, rusiyege qaritilghan jazadin ‍özini qachurmasliqni yaki uninggha buzghunchiliq qilmasliqni, herqandaq shekildiki herbiy yardem bermeslikni éytimiz. Bu xil qollashlar biz her qaysimizning xitay bilen bolghan munasiwitimizge tesir qilidighanliqini qayta tekitleymiz”.

Bayanatta éytilishiche, ikki terep yene xitayning uchurni kontrol qilishi we saxta uchur tarqitishighimu diqqet qilmaqtiken.