Хитай таратқулири нәнчаңда “милләтләр иттипақлиқи оқуш мукапати” тәсис қилған бир уйғур яшни тәшвиқ қилишқа башлиған

“хитай хәвәрлири” ториниң 11-январ күни тарқатқан хәвиридә, җяңшиниң нәнчаң шәһиридә тиҗарәт қиливатқан мирадил исимлик бирәйләнниң өзи оқуған мәктипи— җяңши пән-техника институтиға бир милйон йүән ианә қилип, “анарниң данисидәк зич уюшқан милләтләр иттипақлиқи оқуш мукапати” тәсис қилғанлиқи тәшвиқ қилинған.

Хәвәрдә ейтилишичә, мирадил хотәнниң чира наһийәсидин болуп, 2013-йил 9-айда җяңшиниң нәнчаң шәһиридә алий мәктәп һаятини башлиған, оқуватқан мәзгилидила уйғур райониниң мәһсулатлирини торда сетиш билән пул тепип, кейин ашхана ечип милйонер болған. У нәнчаңдики мәктипигә пул ианә қилип оқуш мукапати тәсис қилмақчи болған болсиму, мәктәп көп қетим уни рәт қилған. Кейин бу мукапатниң “милләтләр иттипақлиқини илгири сүрүш” кә пайдилиқ икәнликини көздә тутуп, мукапат тәсис қилишқа қошулған.

Өз юртидики намратларға әмәс, “ана мәктипим” дәп атиған нәнчаң шәһиридики алий мәктәпкә пул ианә қилған мирадил, хитай таратқулирида “карханичи, йетәкчи, сахавәтчи” дәп тәрипләнгән болуп, “шинҗаң һекайилири” ни сөзләштә аз тепилидиған үлгә қилип көрситилгән. Өткән йил 8-айда, хитай компартийә секретари ши җинпиң үрүмчидә йәрлик даириләргә йолйоруқ бәргәндә “шинҗаңдики аммини ичкири хитайда ишқа орунлаштурушқа йетәкләш, ичкири хитайдикиләрниң шинҗаңға келип игилик тиклишигә ярдәм бериш” дегәнни тәкитлигән болуп, буниңға бинаән хитай тәшвиқатлиридиму “милләтләрниң қошулушини илгири” сүрүшкә пайдилиқ юқириқидәк мисалларниң оттуриға чиқиватқанлиқи көрүлмәктә.